گرانبوونا گازێ خواست ل سهر سۆپێن دارا زێدهكریه
ئهڤرۆ، رهمهزان زهكهریا
ئهڤ ساله ژبهر گرانبوونا بهایێ گازێ، وهلاتیێن دهڤهرا ئاكرێ دهست ب كرینا سوپێن دارا كریه و خواستهكا باش ل سهر ههیه و وهلاتی ژی بۆ دابینكرنا دارا ل گۆر رێنمایێن ژینگههێ دارا كۆم دكهن بۆ وهرزێ زڤستانێ و خۆ گهرمكرنێ.
مشیر هۆكی، هۆستایێ دروستكرنا سوپێن دارا ل دهڤهرا ئاكرێ بۆ ئهڤرۆ گۆت: پار سال خواست ل سهر سوپا نهبوو، ههتا زڤستان ب دووماهی هاتی من كێمتر ژ 10 سوپا دروستكرن و فرۆتن، بهلێ ئهڤ ساله گهلهك خواست ل سهر سوپا ههیه و شهڤ و رۆژ كار دكهم و ڤێرا ناگههم داخوازیێن خهلكی بجهبینم.
ناڤهاتی گۆت ژی: ئهڤ ساله ههتا نوكه گاز وهك پێدڤی نههاتیه دابهشكرن و بهایێ وێ ژی گهلهك یێ گرانه، وهلاتی نهچاربووینه بۆ خۆ گهرمكرنێ سوپێن دارا ل ناڤ رهزێن خۆ دانن، دارێن زراڤ كۆم بكهن و زڤستانێ خلاس بكهن، ژبهر كۆ دار بڕین قهدهغهیه و وهلاتی ژی پێگیرن ب رێنمایێن پاراستنا ژینگههێ، ب تنێ وان دارا كومدكهن كو هشك بن یان ناڤ رهزی د زراڤ بن.
هوستا مشیر خویاكر: ئهڤ ساله ئاسنێ دروستكرنا سوپا گرانتر بوویه، بهلێ ههر ب بهایێ پار سال ئهم سوپا و بوریا دروست دكهین، ئهڤ ساله ههتا نێزیكی 60 سوپا من دروستكرینه و فرۆتینه، رۆژانه وهلاتی بۆ كرینا سوپا سهرهدانا من دكهن، ههر سوپهكا خلاس بوو ل دروستكرنێ كریارێ خۆ ههیه، پلیتێ دكهینه سوپه و گهلهك یێ باشه و تێرا چهندین سالا دكهت.
ناڤبری ئاشكرا كر: بهایێ سوپه و بوریا ژ 55 هزارا دهستپێدكهن بۆ 70 هزارا، پار سال ژی من ئهو بریار دابوو ههر وهلاتیهكێ شیانێن كرینا سوپێ نهبن دێ بێ بهرامبهر دهمێ و چ پارهی ژێ وهرناگرم.