گـرنگییا پـرۆسـا دلنیایـا جـۆری بـۆ مامـۆستایان
جێریـە غـازی
پرۆسەیا دلنیای جۆری ئێكە ژ ئەوان پرۆسەیان یێن كو گرنگیێ ب شیانێن مامۆستای ددەت د بوارێ پەروەردە و فێركرنێ دا. ل ئەڤان هەردو سالان دا دەست دایە جێبەجێكرنێ، لێ ئەڤە ژی ب حەزا مامۆستایانە، ئانكو ئەو مامۆستایێ ئامادەنەبت پشكداربیت، دشێت پشكدارنەبت، لێ یا گرنگە هندی مامۆستای پێ چێبیت پشكداری ئەڤێ پرۆسێ بیت، ژبەركو ڕەنگە ل سالێن داهاتی ل سەر هەموو مامۆستایان بهێتە سەپاندن.
ئەڤێ پرۆسێ گرنگییەكا زۆر بۆ مامۆستای هەیە، كو دبیت مامۆستا ل سەر ئەڤێ گرنگیێ یێ ئاگەهدارنەبیت، ئێك ژ ئەوان گرنگییان ئەوە، كو كاركرن د ئاڤێ پرۆسێدا دبیتە ئەگەرێ بهێزكرن و دەرخستنا شیانێن مامۆستای، ئانكو ب ڕێكا ئەوان ستاندەرێن كو هاتینە دەستنیشانكرن و داخوازكرن، مامۆستا ڕادبیت ب لێگەڕیانا پێزانینان، داكو بشێت ل دویڤ ئەوان داخوازییان كارێ خۆ ب شێوەیەكێ دروست و ب ڕێك و پێك ئەنجام بدەت. دگەل بدەستڤەئینانا پێزانینان، مامۆستا دشێت شیانێن خۆ یێن ڤەشارتی دەربێخیت، بۆ نموونە نڤیسینا ڤەكۆلین و گۆتاران د بوارێ پەروەردە و فێركرنێدا، پێشكێشكرنا سیمیناران، ئامادەبوون د كۆڕ و سمیناران دا، نڤیسینا پەرتووكان، كارێ وەرگێڕانا پەرتووكان، هەلسەنگاندنا قوتاییان..هتد، ئەڤجا ئەڤ كارو چالاكییە چ دناڤ قوتابخانێ دابن یان ژ دەرڤەی قوتابخانێ بن. ب ئەڤێ كریارێ مامۆستا دبیتە مامۆستایەكێ بەرچاڤ و هەم ژی ئاستێ ئەوی یێ زانستی بەرەڤ پێشڤەدچیت و دشێت ب شێوەیەكی باشتر و سەركەفتیانەتر وانەیێ بگەهینتە قوتابییان. ژ لایەكی دیترڤە ژی پەیوەندیێن ئەوی دگەل جڤاك و دەورووبەری دا بهێز دكەڤن، ژبەركو پشكداریكرنا ئەوی د لایەنێن جودا جودادا زێدەتردبت. هەر دیسان ئەو مامۆستا دبیتە نموونەیەك بۆ مامۆستایێن دیتر كو ژبەر كارێن ئەوی یێن ب بها و گرنك ئەوێن ئەنجامددەت، مامۆستایێن دی ژی چاڤ لێ بكەن و ئەوژی پشكداریێ د ئەڤێ پرۆسێ دا بكەن.
ئێك ژ خالێن دیتر ئەوە مامۆستا دشێت ب ڕێكا ئەڤێ پرۆسێ خۆ بهەلسەنگیت و خالێن بهێز و لاواز دەست نیشان بكەت و چارسەرییا ئەوان خالێن لاوازبكەت، ب ئەڤێ كریارێ ئەو مامۆستا ئەركێ بەرپسیارەتیێ ل نك خۆ زێدەتردبیت، لێ باوەریێ و ڤیانێ ل دەڤ قوتابی و مامۆستا و كەسانێن دیتر زیدەتر لێ دكەت.
خالا گرنگ و دوماهییێ ئەوە كو ب شێوەیەكی گشتی ئەو قوتابخانەیا مامۆستایێن وێ پشكداری ئەڤێ پرۆسێ دبن، دبیتە قوتابخانەیەكا هەرە باش ل سەر ئاستێ قوتابخانەیێن دیتر، ژبەركو پرۆسەیا دلنیای جۆری ڕێكەكە كو مامۆستایێن بهێز و خودان شیان و مامۆستایێن بێ شیان و بێ داهێنان پێ بهێنە دیاركرن و ژ ئێك جوداكرن.