گـرنگە قـانـوونەک بـۆ خـودانێن پـەیجان هەبیت
هەرهین محەمەد:
نوکە سناپچاتی بینه‌ره‌كێ باش هه‌یه و ل ئه‌ڤێ دووماهیێ گه‌له‌ك په‌یچ ده‌ركه‌فتینه ژ بۆ ئه‌كتیڤكرنا په‌یچێ خۆ و لایك و كومێنتا وێنه‌یێن كچان بەلاڤ دکەن و مانشێتێن سەرنجڕاکێش دداننە سەر داکو سەرنجا خەلکی ڕاکێشن رۆژنامه‌ڤانه‌ك ژی دبێژیت: دڤێت په‌رله‌مان قانوونه‌كێ ده‌ركه‌ت و هنده‌ك مه‌رچ بهێنه دانان ژبۆ خۆدان په‌یچان.
رۆژنامه‌ڤان، زه‌هرا ئیحسان دیار کر کو پێدڤیه ساسنسوره‌ك بۆ وان كه‌سان هه‌بیت ئه‌وێن پوستا ل تورا سناپی بەلاڤ دكه‌ن، نه هه‌ر كه‌سه‌كێ ڤیا په‌یچه‌كی چێكه‌ت و گۆت: نوكه ئه‌م ل سه‌رده‌مێ سوشیال میدیایێ داینه مه بڤێت و نه‌ڤێت هه‌ر كه‌سه‌ك دێ بو خۆ تشته‌كی به‌لاڤ كه‌ت، به‌لێ یا گرنگه قانوونه‌ك بۆ ئه‌ڤی بابه‌تی هه‌بیت و بهێته رێكخستن، بو نمونه ئه‌و كه‌سێ پەیچەکێ گشتی ڤەدکەت پێدڤیە هنده‌ك پێزانین ژێ بهێنە وه‌رگرتن، د هەمان دەمدا پێدڤیە چاڤدێریەک لسەر هەبیت.
زەهرایێ دیار کر ژی، ده‌مێ ئەو کەسە تشته‌كی به‌لاڤ دكه‌ن بلا هزرا كه‌سانێن به‌رامبه‌ری خۆ و مالباتا وان ژی بكه‌ن و خوه بداننە شوینا وان نەک هەر گاڤا کەسەکی تشتەک کر یان دەنگۆیەک لسەر بەلاڤبو، ژبۆ لایك و كومێنتا بكاربینن و مانشێتێن سور و زه‌ر داننه سه‌ر دا زوی چاڤێ بینه‌ری بكێشیته خۆ و ئه‌وی پوستی ڤه‌كه‌ن و گۆت: بتنێ داکو ئەو بگەهنە مەرەما خۆ لنك وان یا گرنگ نینه ئه‌و چه‌نده یا راست بیت یان نه.
زەهرایێ د بەردەوامیا ئاخفتنێن خۆدا گۆت: ژبۆ به‌لاڤكرنا پوستان پتریا په‌یچێن سناپی وێنه‌یێن كچان بكاردئینن و ئه‌ڤێ چه‌ندێ وه‌كریه، ئێدی نه كور و نه كچ بۆ مه رۆژنامه‌ڤانان نا ئاخڤن و دترسن بكه‌ڤنه ئه‌ڤان په‌یچان، له‌ورا دڤێت یاسا ل سه‌ر ب راوستیت و په‌رله‌مان قانوونه‌كێ ده‌رباره‌ی ئه‌ڤێ چه‌ندێ ده‌ركه‌ت و ئه‌ڤ په‌یچه بهێنه راوستاندن.
سه‌ردار حسێن، شاره‌زا د بوارێ سوشیال میدیایێ و ته‌كنه‌لوژیایێ دا دیار کر کو نوکە پتر ژ هه‌موو توران ئه‌كتیڤ كه‌فتیه دناڤ سناپی و تیكتوكی دا و هه‌كه به‌رێ خۆ بده‌ینه سناپچاتی هه‌ر ئاپدێته‌كا نوی بۆ سناپی بهێت گرنگیێ ب بەگراوه‌ندی دده‌ت و ئه‌و پوستێن مرۆڤی ده‌ستپێكی به‌لاڤكرین بینه‌ر نابینن بتنێ به‌گراوه‌ندێ دووماهیێ دهێته دیتن.
سەردار گۆت: د نوكه‌دا گه‌له‌ك په‌یچ ب هنده‌ك ناڤان هاتینه چێكرن و مه‌ره‌قێ ژبۆ بینه‌ری چێدكه‌ت سه‌حكه‌ته هه‌موو پوستێن وی و گه‌له‌ك په‌یچ هه‌نه بینه‌رێ باش نینه، ئەڤجا نه‌چار دبیت بخو بەگراوه‌نده‌كی چێكه‌ت و بینه‌ران بخۆڤه گرێده‌ت و گۆت: نوكه ئه‌و ئاپدێتا نوی یا سناپی نڤیسینا زه‌ر زێده كریه و به‌ری نوكه ژی هه‌بوو خۆدانێن په‌یچان ئه‌ڤێ نڤیسینێ بكاردئینن و بینه‌ران پێڤه گرێدده‌ن.
سەردار د بەردەوامیا ئاخفتێن خۆدا گۆت: پشتی نڤیسینا زه‌ر دهێته‌دانان خۆدانێ په‌یچی دێ ل سه‌ر بەگراوه‌ندی چێكه‌ت هه‌واره فلان كه‌سی چو بسه‌ری ڤی كه‌سی ئینا، یان فلان كه‌سێ شویكر، یان خوه كوشت، یان ل دهۆكێ چ رویدان چێبوو و هه‌كه بۆ مه‌ره‌ق و ڤیا سەحکەتە بەگراوه‌ندی نه‌چاره سه‌حكه‌ته هه‌موو ستوریێن دەستپێکێ به‌لاڤكرین، ئەڤە ژی د بەرژەوەندیا واندایە و ئەکتیفا خۆ پێ خۆش دکەن.
