گولچیچه‌ك ژی ڤڕا ل من دده‌ن
عارف حیتۆ
(1)
هه‌كو دهێته به‌ر په‌نجه‌رێ و په‌ردێ ڤه‌دده‌ت
به‌ژنا وێ وه‌ك شه‌رابێیه و
گرنژینا وێ ل با من.. مۆسیقایه
هه‌كو باران ب جامێ دكه‌ڤیت و ب نه‌رمی
تكا لێدده‌ت
د ناخێ من دا هه‌رایه و شه‌هیانه‌كه
ب جۆقه و ده‌هۆل و زڕنایه
هه‌رچار تلێن خوه ب خۆشی د بای دوه‌رینم
ئه‌و سلاڤێ وه‌ردگریت و
به‌رسڤا وێ- ب ته‌نا خوه- كۆده‌تایه.
*
(2)
ل به‌ر سیبه‌را چناره‌كێ
كه‌فتم هزران و ته‌خمینێ
ما دا چ بیت..؟!
ئه‌گه‌ر ئه‌ز ئه‌ڤ داره بامه و
یارا من ژی زه‌رزویری با
هه‌رۆ سپێدێ
ل سه‌ر چقه‌كێ من خواند با و
ل به‌ر بسترینا چووچكێ، سه‌رخۆش ببام
د سه‌رخۆشیێ دا…
دبمه پارسه‌نگێ یه‌قینێ و ب له‌پان دگرم
ژین و ژیار و به‌رژه‌نگێن نووهه‌بینێ!
*
(3)
من دزانی ته حه‌ز دكر
شعرێن من د عه‌شقا ته دا مناره بن
هه‌ستێن من یێن هه‌لچوویی و كه‌ل
ل به‌ر په‌نجه‌را ته‌یا گرتی مه‌داره بن
لێ من نه‌كر..
چونكو گه‌ردێن هه‌ناسا ته ب تنێ به‌سن
كو ژیانێ بكه‌یه عه‌شق و جیهانێ مشتی ڤیانكه‌ی
حزوورا ته ب سینگێ ئه‌ردی ڤه كافیه
كو خۆشیێ ب گرنژینێن خوه دووجانكه‌ی.
*
(4)
عه‌مرێ من هێژ چارده سال بوون
هه‌كو عه‌شقێ دادایه سه‌ر دلێ دلین
ئه‌وێ عه‌شقێ جیهان كره باخچه‌یه‌ك و
ده‌ستێن من مشت كرن یه‌قین
سال هاتن و چوون..
چه‌ندین بوهار ژ عه‌مری ڤه‌بوون
وه‌لێ هێشتا ئه‌و عه‌شقا من یا ئه‌وه‌لی
د چاڤێن خه‌مگین دا دوڕیه‌كه و د دل دا ئێتوین.
*
(5)
تو چرایی.. ل تاریستانا شه‌ڤێن من
به‌وصه‌له‌یی.. ل چارڕیانا ڕه‌ڤێن من
سترانه‌كێ چووچك دادانه لێڤێن ته و ڤه‌جه‌ماندن
ته‌ڤ سه‌ربۆرێن هه‌یی و نه‌یی
پرچا ته نێرگزه ل به‌ر به‌ته‌نا و
چاڤێن ته ژی برومیتۆس
پێنگاڤا ته.. هه‌لزه ل ناڤا گلكه‌نا و
كه‌نیا ته ژی شێخێ دامووس..!
*
