گولێ حه‌سه‌ن: كورته فلمێ (هه‌مان وێنه) گه‌هشته قوناغا مۆنتاژكرنێ
دهۆك، شاكر ئه‌تروشی:
ئه‌كته‌را به‌رنیاس (گولێ حه‌سه‌ن) د دیداره‌كێ دا بۆ رۆژناما ئه‌ڤرۆ دیاركر كو ل چه‌ند رۆژێن بۆری ئه‌و ژ وێنه‌كرنا كورته فلمه‌كی ب دووماهی هاتینه و نوكه گه‌هشتیه قوناغا مۆنتاژكرنێ و پشتی چه‌ند حه‌فتیێن دی دێ یێ به‌رهه‌ڤ بیت پشكداریێ د فیسته‌ڤالان دا بكه‌ت.
گولێ گۆت: ناڤێ كورته فلمی (هه‌مان وێنه) یه، ناڤێ من ژی (نازه) سیناریۆ و ده‌رهێنان كامه‌ران مه‌نسوره، چه‌ند ئه‌كته‌رێن دی ل گه‌ل من د پشكدارن، ژوانا (سه‌ربه‌ست ئه‌حمه‌د، حه‌مه عه‌لی خان) و هنده‌كێن دی، ناڤه‌رۆكا فلمی ل دۆر كه‌سه‌كی یه به‌ری بچیته ده‌رڤه‌ی وه‌لاتی رۆژه‌كێ ل گه‌ل جیرانه‌كێ خوه دچنه سه‌یرانه‌كێ و ل وێرێ وێنه‌كی پێكڤه دگرن و ئه‌و گه‌له‌ك حه‌ز ژ وی وێنه‌ی دكه‌ت، له‌ورا پشتی چه‌ند سالێن غه‌ریبێ جاره‌كا دی دزڤریته وه‌لاتێ خوه و حه‌زدكه‌ت جاره‌كادی ل گه‌ل جیرانێ خوه یێ به‌رێ بچنه وی جهی وێنه‌كێ دی پێكڤه بگرن، لێ ده‌می دگه‌هیت دبینیت كو جیرانێ وی یێ تووشی ئێشه‌كا ده‌روونی بووی و ئه‌و ژی بۆ گه‌له‌ك عاجز دبیت، له‌ورا نافێ فلمی كریه (هه‌مان وێنه) ئانكو هه‌ر ئه‌و وێنه.
ل دووماهیێ گۆت: ژبلی كارێ هونه‌ری نوكه ئه‌م مژوولی رێكخستنا فیسته‌ڤاله‌كا ئه‌ده‌بی نه كو ل 26 هه‌یڤا بهێت دێ ل باژێرێ سلێمانیێ هێته گێڕان و هژماره‌كا نڤیسكارێن كورد و بیانی دێ ل فیسته‌ڤالێ حازربن و بۆ ده‌مێ سێ رۆژان دێ یا به‌رده‌وام بیت.
