گونۆلێ كلیپەكا نوو بەلاڤكر
زنار تۆڤی:
سترانبێژ گونۆل دیلان، كو خەلكا باژێرێ ئامەدێ یە ل باكورێ كوردستانێ، ل گەل هندێ كارێ ئەكتەرییێ ژی دكەت و هەتا نوكە پشكداری د چەندین كارێن درامایی دا كرییە، د دیدارەكێ دا بۆ رۆژناما ئەڤرۆ دیاركر كو ل چەند رۆژێن بۆری وێ سترانەكا نوو ب ناڤێ (تۆ زوو چووی) كلیپكرییە و هەتا نوكە وێ هژمارەكا كلیپان و سێ ئەلبۆمێن سترانان و چەندین سترانێن سینگل ژی بەلاڤكرینە، ل رۆژێن بۆری وێ چەند كۆنسێرت ل باژیرێ ئەدمونتۆن ل كەنەدا و ل باژێرێ سانفرانسیسكۆ و باژێرێ شیكاگۆ ل وەلاتێ ئەمریكا گێڕاینە.
هەروەسا گۆت: بەری چەند رۆژان ئەو ڤەگەریایە باژێرێ ئامەدێ و نوكە ئەو مژوولی تۆماركرنا سێ سترانێن نوویە، وێ ل بەرە د ئەڤ سالەدا وان ستران ژی كلیپ بكەت، هەروەسا ئەو حەز دكەت پشكدارییێ د فلمێن سینەمایی دا بكەت و هەتا نوكە وی پشكداری د دو فلمێن سینەمایی دا كرییە، ئەو وەكو ئێك حەز ژ سترانگۆتنێ و درامایێ ژی دكەت و هەردو وەك ئێك بۆ وێ دخۆشن، وێ ڤیایە ب رێیا هونەرێ خۆ خزمەتا هونەرێ كوردی بكەت و دیسان ئەو ئامیرێ سازێ ژی دژەنیت و پشتەڤانیێ ل ژنان دكەت، كو د وارێ هونەری دا كاربكەن.