گوهۆڕین د گەشتێن هشكانی یێن حەجیێن هەرێمێ دا هاتە كرن
زنار تۆڤی:
رێڤەبەریا گشتیا حەج و عومرێ ل هەرێما كوردستانێ راگەهاند، بۆ ئەڤ سالە ئەو حەجیێن ب رێكا هشكانی دچنە حەجێ، ل دەرگەهێ سنۆرییێ عەرعەر ب فڕۆكێن سعوودی بۆ باژێڕێ جەدە دێ هێنە ڤەگوهاستن، ب مەرەما كێمكرنا وەستیانێ و ئاسانكاریێ بۆ حەجیان.
وریا بالیسانی، رێڤەبەرێ گشتییێ حەج و عومرێ ل هەرێمێ د كۆنگرەكێ رۆژنامەڤانی دا دیار كر، پرۆسەیا ب رێكرنا حەجیان ب رێكا هشكانی ل رۆژا 6ی گولانا 2026ێ، دێ دەستپێكەت، حەجی شەڤا ئێكێ دێ ل باژێڕێ كەربەلا مینن، رۆژا پاشتر دێ بەرەڤ سنۆرێ عەرعەر ب رێكەڤن، ل وێرێ ل شوینا پاسان، ب فڕۆكان بۆ باژێڕێ جەدە دێ هێنە ڤەگوهاستن.
ناڤهاتی گۆت: «ئەڤ بڕیارە هاتەدان، پشتی ئەم نەشیاین جهێ ئاكنجیبوونێ ل باژێڕێ مەدینێ بۆ دەمێ زڤڕینێ دابین بكەین، لەوما ل سەر راسپاردا وەزیرێ ئەوقافێ و ب هەماهەنگی ل گەل لایەنێن ئیراقی، بڕیار هاتەدان رێكەكا ب ساناهیتر بۆ حەجیان بهێتە دیتن».
گۆت ژی: «ل دووڤ پلانا نوو، حەجی ژ فڕۆكخانەیا عەرعەر بۆ باژێڕێ جەدە دێ هێنە ڤەگوهاستن، ژ وێرێ ژی دێ بەرەڤ مەككەها پیرۆز ب رێكەڤن، دیسا هەموو ئامادەكاری ل ل خورماتوو و كەربەلا بۆ پێشوازیكرن و ڤەحەواندنا حەجیێن هەرێمێ هاتینە كرن».
