گۆڕستانا میران ل ئامێدیێ دهێتە نووژەنكرن
ئامێدیێ، مەحمود نهێلی:
ژبۆ زێدەتر گرنگیدان ب جهێن شوونواری و پاراستنا وان ژ ناڤچوونێ و راكێشانا گەشتیاران، هەژمارەكا جهێن شوونواری ل سنۆرێ دەڤەردارییا ئامێدیێ دهێنە نووژەنكرن، ژ وان ژی گۆڕستانا میران ل سەنتەرێ دەڤەرداریێ.
وارشین سەلمان، دەڤەردارێ ئامێدیێ بۆ رۆژناما ئەڤرۆ دیار كر، ژ بۆ پتر گرنگیدانا حكومەتا هەرێما كوردستانێ ب كەرتێ شوونواری و پاراستنا جهێن شوونواری یێن دەڤەرا ئامێدیێ، دەست ب نووژەنكرنا گۆڕستانا میران ل ئامێدیێ هاتیە كرن و گۆت: «ئەڤ جهێ شوونواری ژ لایێ رێكخراوەكا فرەنسی دهێتە نووژەنكرن و نوكە كار ل سەر دهێتە كرن».
گۆت ژی: «نووژەنكرنا گۆڕستانا میران ل ئامێدیێ و شەش جهێن دی یێن شوونواری ل دەڤەرێ دێ بیتە ئەگەرێ پێشئێخستنا دەڤەرا ئامێدیێ ژ لایێ گەشتوگوزاری و پاراستنا جهێن شوونواری ڤە».
