گێژبوون نیشانا گەلەک نەخۆشییانە
بەرپەڕێ ساخلەمیێ:
د. سەگڤان محمد صالح تایبەتمەندێ نەخۆشیێن مێشک و دەماران، ئاماژێ ب هندێ ددەت کو گێژبوون ب خۆ نەخۆشی نینە بەڵکو نیشانەکە بۆ هەبوونا گرفتەکێ د لەشێ مرۆڤی دا کو دشێت ژ ئەگەڕێن جوداجودا پەیدا ببیت.
ناڤهاتی روون دکەت کو ئەگەڕێن سەرەکی دابەش دبن ل سەر چەندین لایەنان وەکی نەخۆشیێن گوهێ ناڤین و کێشەیێن ڕاستەوخۆ د مێشکی ب خۆ دا یان پارچەیێن مێشکێ بچووک و جذع الدماغ. زێدەباری ڤێ چەندێ تێکچوونا فشارا خوینێ و نەخۆشیێن دی یێن ئەندامێن وەک گولچیسکا و میلاک و زەرکێ ژی دشێن ببنە ئەگەرێ پەیدابوونا گێژبوونێ د لەشیدا.
د بەردەوامییا ئاخڤتنا خۆ دا تایبەتمەندێ نەخۆشیێن مێشک و دەماران دیار دکەت کو جۆرێن گێژبوونێ جودانە ئێک ژ وان ئەوە کو دونیا ل بەر چاڤێن مرۆڤی دزڤریت کو ئەڤە پتر پەیوەندیدارە ب كێشهیێن گوهی یان دەمارێن مێشکی دا، بەلێ جۆرەکێ دی هەیە کو تێدا چاڤێن کەسی تاری دبن و هەست ب کەفتنێ دکەت کو پتریا جاران ژ کێمبوونا فشارا خوینێ پەیدا دبیت، زێدەباری جۆرەکێ دی کو ڕاستەوخۆ کار دکەتە سەر تێکچوونا هەفسەنگیا مرۆڤی ل دەمێ ڕێڤەچوونێ.
ل سەر لایەنێ مەترسیداریا ڤێ دیاردێ د.سەگڤان تەکەزێ ل سەر هندێ دکەت کو ئەو گێژبوونا پەیوەندیدار ب مێشکی و دەماران پێدڤی ب هۆشیاریا لەز هەیە. ل دەمەکی کو گێژبوون ل گەل نیشانێن وەک دوبارە دیتنا تشتان ل بەر چاڤان یان گرانبوونا ئەزمانی ئو سستبوونا دەست و پییان یانژی سەرئێشەکا گەلەک ب هێز ڕووبدەت ئەڤە نیشانا حالەتەکێ مەترسیدارە و ئەڤ کەسە پێدڤیە ب لەزترین دەم سەرەدانا نۆشداری یان نەخۆشخانێ بکەت، چونکی چێدبیت ئەگەرێ وێ جەڵتە یان هەودان یان گرێکەک د مێشکی دا بیت.
د بەراورکرنێ دا د ناڤبەرا گێژبوونا ژ گوهی و ئەوا ژ مێشکی دا دهێتە دیارکرن کو گێژبوونا گوهی گەلەک سلامەتترە و ئاریشێن زێدەتر وەک سستبوونا ئەندامێن لەشی یان ئاخڤتنا گران ل گەل نینن.
د.سەگڤان، دیاردکەت بۆ دەستنیشانکرنا دروست مێژوویا نەخۆشیێ ژ کەسی دهێتە وەرگرتن ئو پشکنینێن پێدڤی و هەتا ڕەنین ژی دهێنە کرن دا کو ئەگەرێ تهمام دهێتە دەستنیشانکرن و چارەسەریا گونجای بۆ دهێتە دان.
د.سەگڤان محمد صالح، شیرەتان پێشکێشی مالباتان دکەت کو ل دەمێ ڕوودانا حالەتێن لەز و هەبوونا نیشانێن مەترسیدار نەخۆشی ب بێ گیروبوون بگەهێننە نەخۆشخانێ و ل دەمێ نیشانێن مەترسیدار نەبن بلا نەخۆش خۆ ژ لڤینێن زێدە دۆر بپارێزیت چونکی لڤین دبنە ئەگەرێ زێدەبوونا گێژبوونێ هەتا کو دگەهیتە ل دەڤ نۆشدارێن تایبەتمەند.
