گەلێ كوردستانێ منەتبارێ جەنابێ سەرۆك بارزانی یە
عەمەر هەرگۆشی
ئەو دۆخێ سەختێ ئابری كو ب سەر خەلكێ كوردستانێ دا هاتی كاریگەریەكا خراب ل سەر رەوش و دەروونێ هەڤوەلاتیان دا هاتەكرن، هەولەكا خراب بوو ژ لایێ نەحەزێن كوردستانێ كو ئەو پێشكەوتن و ئارامیا ل هەرێمێ بشێوینن و زیانەكا زۆر ب ناڤودەنگییا هەرێمێ و ئاستێ ژیان و گوزەرانا خەلكی بگەهینن. ل دەستپێكێ جەنابێ سەرۆك بارزانی هوشداری دا و فەرموو ئەوە ناهێتە قەبوولكرن و ئەو رەفتارانە نابی بەردەوام بن، گەلێ كوردستانێ ژی چ جاران سەرێ خۆ بۆ زۆرداران نە چەماندیە و هەرجار د سەنگەرێ پاراستنا ماف و كەرامەتا كوردایەتیێ دا بووینە و چو جاران ژ بۆ پارە و مووچەی واز ل بەرژەوندیێن بالا یێن نەتەوەیی نە ئیناینە و ل دویڤ فەرمان و رێنمایێن جەنابێ سەرۆك بارزانی د خەبات و بەرخودانێ دا بووینە بۆ خزمەتا خاك و گەلێ خۆ.
ئەو خۆڕاگری و رۆلێ پیرۆزێ جەماوەرێ كوردستانێ ل ڤان كاودانێن سەخت و پر ئێش دا ل بێ مووچەیی و بێ پارەیێ دا چو جاران ناهێتە ژبیركرن و جەنابێ سەرۆك بارزانی ژی ب فەر زانی ژ دل سۆپاسیا گەلێ كوردستانێ بكەت بۆ جامێری و مەردایەتیا وان نواندی ل خۆڕاگریێ و بەرخودانێ. هەلبەت گەلێ كوردستانێ باوەریەكا مەزن یا ب پارتی هەی كو د دەهان سالێن رابردو دا هەر جار خۆدان بەلێن و سۆز دەركەفتیە و ل هەمی نەخۆشیان خۆدی دەركەفتیە ل گەلێ كوردستانێ و ل هەمی تەنگاڤی و ئالۆزیان دا مەرەەما سەر برینێن كوردان بوویە و ل رۆژێن كیمیا باران و ئەنفالان و كورد قرانا دا چو جاران مەیدانا بەرخودانێ و قوربانیدانێ چۆل نەكریە و هەر جار رۆلێ ئێكلا كەرەوە یێ لەیزتی د سەركەفتنا و ب دەستئینانا مافێن رەوا یێن گەلێ كوردستانێ و سەر شۆركرنا دوژمنان و كرێگرتیێن وان.
ئەڤرۆ گەلێ كوردستانێ شیا ب خۆڕاگری و ب هێزا خۆ ب پشتەڤانیا پارتی و حوكمەتا هەرێما كوردستانێ مووچەبرا ناچار كەت كو دانێ ب راستیێ دا بینن، چو جار بەرهەنگاری داخوازیێن رەوا یێن خەلكێ كوردستانی نەبن و هەول نەدەن مافێ گەلێ كوردستانێ بنپێ كەن، ئەڤ سەركەفتنە ل گەلێ كوردستانێ پیرۆزە، بێگومان ب ئێكگرتنێ و برایەتیێ دێ شێین ل سەركەفتنا بەردەوام بین و دەرفەت بۆ ناحەزا نامینیت ب ساناهی مافێن گەلێ مە پێشێل بكەن.
