گەڕا 31ێ روودانێن جودا بۆ یانەیێن كوردستانی پەیداكرن
قەیس وەیس:
ب دووماهی هاتنا یاریێن گەڕا 31ێ ژ خولا ستێرێن ئیراقێ یا فوتبۆلێ یانەیێن كوردستانێ ب دو سەركەڤتن و دو وەكهەڤی ب دەستڤە ئینان، د ڤێ گەڕێ دا هندەك پێشهاتەیێن نوو دناڤا یاریگەهان دا هاتنە روودان و بڤی شێوەیی.
گەنجێن دهۆكییان سەركەڤتن ئینا
تیما یانەیا دهۆك شیا ب گەنجێن پارێزگەها خوە سەركەڤتنەكا ژ هەژی ل سەر یانەیا نەجەف بینت ب دو گۆلان بەرانبەر گۆلەكێ، یاری هەتا خولەكا 90+2 ب وەكهەڤی بڕێڤەچوو، لێ كوڕێ باژێرێ سێمێلێ ژیار ئیسماعیل یێ 21 سالی وەكو یاریزانێ یەدەك شیا گۆلا سەركەڤتنێ د خولەكا 90+3 دا بینت و سێ بوهاترین خال بۆ دهۆكێ بینیت، ژلایەكێ دووڤە كوڕێ باژێرێ ئاكرێ گۆلپارێزێ یانەیا دهۆك ئەحمەد بەشار شیا ب باشترین شێوە گۆلا خوە پارێزیت ژ كۆمەكا هێرشێن مەترسی ژ وانا سێ هێرشێن مەترسی و شۆتكرنێ شیا ب شیانێن خوە نەهێلیت ببنە گۆل، ئەڤی ئەنجامی تیما دهۆكێ ڕێزبەندیەكێ پێشڤە برە ڕێزا 11ێ ب كۆمكرنا ب41 خالان پشتی چار یاریێن دووركەڤتنێ ژ سەركەڤتنان.
یاریزانێن زاخۆ و كارتێن سۆر و
ژ دەستدانا خالان
تیما یانەیا زاخۆ دو خالێن گرنگ بەرانبەر خودانێن ئەردی یانەیا نەفت یا بەغدایی ژ دەستدا ئەوا ب گۆلەكێ وەكهەڤبووین، یا سەرنجرا كێش د ڤێ یاریێ دا پێنچ كارتێن سۆر بارا تیما زاخۆ بوون، سێ ژ وان بۆ یاریزانان ئەو ژی هەر ئێك ژ ئەحمەد ئیبراهیم، غابی كیكی و حەسەن ئەلرائید، دگەل ئۆسامە عەلی و تاها عەبدولحەكیم سەرپەرشتێ تیمێ، یا سەیرتر پشتی دوورئێخستنا سێ یاریزانان دو دەلیڤەیێن گۆلكرنێ ب سانەهی ژ یانەیا زاخۆ چوون و نەشیان بكەنە گۆل.
لدووڤ ئاماران یاریزانێن یانەیا زاخۆ 12 كارتێن سۆر وەرگرتینە كو دبیتە ڕێژەیەكا مەزن و ڕیكۆرد دناڤ تیمێ دا و دخولا ئەڤ سالە دا ئەوێن بڤی شێوەیی بوون، ناسر محەمەدو بەرانبەر دیالا و كەرخێ، ئۆرینۆ بەرانبەر كەرخ و نەجەف، مەهدی كامل بەرانبەر ئەمانەت بەغدا، جۆزێڤ ماوریسۆ بەرانبەر مینا، حەسەن ئەلرائد بەرانبەر ئەلگەرمە و نەفت، ئەحمەد ئیراهیم بەرانبەر مووسل، زەورا و نەفت و غابی كیكی بەرانبەر نەفت.
هەولێریان ئاستەنگەك ڕاكر
تیما یانەیا هەولێر ئێك ژ ئاستەنگێن بەرانبەری وێ بۆ پاراستنا ڕیزبەندییا خوە و پێشڤەچوونێ ڕاكر پشتی شیایی سەركەڤتنەكا دراماتیكی ل سەر یانەیا تەلەبە یا بەغدایی بینیت ب 3-2 گۆلان، د یارییا واندا ئەوا ل یاریگەها مەدینە ل بەغدا هاتیە كرن، ئەڤ سەركەڤتنە یا ڕێكخۆشكەر بوو تا ڕادەیەكی هیڤیێن پاراستنا ڕێزا سێیێ و زێدەتر پێشڤەچوو باشتر لێكریە، ژبەركو هەولێر ڕێزا سێیێ پاراست ب63 خالان و تەلەب ل ڕێزا چارێ ما ب 58 خالان جوداهی ژ دو خالان كرە پێنچ خال، هەروەسان دەلیڤەیا ڕێزا دویێ ژی خۆشتر كرییە ئەوا شورتە ب64 خالان ڕێزا دویێ دهێت.
نەورۆزێ خودانا سەرێ لیستێ ڕاوەستاند
ژلایێ خوەڤە تیما یانەیا نەورۆز ئەوا سێ خال بەرانبەر خودانا سەرێ لیستێ یانەیا جەوییە ژ دەستداین، پشتی ب وەكهەڤییا گۆلەكێ یاری ب دووماهی هاتبوو، دهەمان دەمدا دیارییەك پێشكێشی یانەیا هەولێر كری، هەرچەندە نەورۆز هەتا خولەكا 67 یا سەركەڤتی بوو لێ گۆلا جەوییە یا وەكهەڤیێ یاری بدووماهی ئینا، نەورۆز ل ڕێزا نەهێ دهێت ب كۆمكرنا 44 خالان و یانەیا جەوییە سەرێ لیستێ دهێت ب71 خالان.
ئەینییا بهێت هەڤڕكیێن گەڕا 32ێ دێ هێنە كرن
بڕیارە ل ئەینییا بهێت دەست ب هەڤڕكیێن گەڕا 32ێ ژ خولا ستێرێن ئیراقێ یا فوتبۆلێ بهێنە كرن و یاری د بەردەوامبن هەتا رۆژا شەمبی و بڤی شێوەیی.
رۆژا ئەینی ئێكێ ئەیارێ
زاخۆ- نەفت میسان، ل دەمژمێر پێنجی ئێڤاری ل یاریگەها زاخۆ.
زەورا- دهۆك، یاریگەها ئەلمەدینە، دەمژمێر 7:30 شەڤ.
ئەلگەرمە- نەورۆز، یاریگەها رومادی، دەمژمێر 7:30 شەڤ.
شورتە- نەفت، یاریگەها شەعب، دەمژمێر پێنجێ ئێڤاری.
دیالا- تەلەبە، یاریگەها دیالا، دەمژمێر پێنجێ ئێڤاری.
یاریێن رۆژا ئەینی دویێ ئەیارێ
هەولێر- كەرخ، یاریگەها هەولێرێ، دەمژمێر پێنجێ ئێڤاری.
مووسل- ئەلغراف، یاریگەها دهۆك، دەمژمێر پێنجێ ئێڤاری.
ئەمانەت بەغدا- ئەلقاسم، یاریگەها كەرخ، دەمژمێر پێنجێ ئێڤاری.
كارەبا-نەجەف، یاریگەها زەورا، دەمژمێر 7:30 شەڤ.
مینا- جەوییە، یاریگەها مینا، دەمژمێر 7:30 شەڤ.
