ھنگافتنێ دووماھی ب کاروانێ پیشەکارێ بەرازیلی یێ زێرەڤانی ئینا
ئەڤرۆ نيوز:
سەرپەرشتێ تیما تەپا پێ یا زێرەڤانی دیارکر کو ھێرشبەرێ وان یێ بەرازیلی دوس سانتوس توشی ھنگافتنەکا مەترسیدار بویە و بۆ ئەگەر کاروانێ وی یێ وەرزشی دگەل یانێ ب دووماھی بینت ل ڤی وەرزی دیسان داخوازیەک ژی ب رێکا رۆژناما ئەڤرۆ ژ ئێکەتیا تەپا پێ یا کوردستانێ ھەیە.
زێدەتر ماھر نزارکی د داخویانیەکا تایبەت دا بۆ رۆژناما ئەڤرۆ گۆت: د یاریا گەرا بوری یا خولا ھەرێما کوردستانێ دا دگەل یانا ئارارات ئەوا ب وەکھەڤی ب دوماھی ھاتی تێدا ھێرشبەرێ تیمێ یێ بەرازیلی توشی ھنگافتنەکا مەترسیداربوو د پێ وی یێ راستێ دا و دووماھی ب کاروانێ وی یێ وەرزشی ئینا ل ڤی وەرزی د خولا ھەرێما کوردستانێ یا تەپا پێ دا پشتی ل رۆژا شەمبیا بوری نشەگەری ل نەخوشخانەیا دھۆک بۆ وی ھاتیە کرن.
ناڤھای ئەو چەندە ژی دیارکر ئەو دێ ل ڤی ماوەی چاڤدێریا تەندروستیا پیشەکارێ خوە دوس سانتوس کەن و یا پێدڤی بیت دگەل مافێن وی دێ ژ لایێ یانێ ڤە ھێنە دان تاکو ژ ڤێ ھنگافتنێ خلاس دبیت دیسان دێ بزاڤێ کەین لێگەریانا ھێرشەبەرەکێ دی بکەین داکو وێ کێماسیا د پێکھاتێ تیمێ دا نە مینت.
ل دووماھیێ ماھر داخوازەک ب رێکا رۆژناما ئەڤرۆ ژ ئێکەتیا تەپا پێ لژنا دادڤانێن کوردستانێ کر کو زێدەتر گرنگیێ ب گیانێ وەرزشی ناڤبەرا تیمان دا پەیدابکەت دوور ژ ھەر ئەنجامەکی دیسان یاریەکا جوان بێ توندوتیژی بھێتە کرن و دادڤان ژی زێدەتر ب ھوشیاری سەرەدەریێ دگەل رویدانان بکەن داکو زەحمەت و مەزاختیێن چو یانا ب ھەروە نە چیت ب ئەگەرێ بریارەکا خەلەت یا دادڤانان کو پێدڤیە زێدەتر دادپەروەربن و ئەڤ خالێن مە دیارکرین بیتە فاکتەرەکێ گرنگ پشتەڤانێن یاریا تەپا پێ یا خولا کوردستانێ خوشیێ ژ بینن.
