یاری ب تۆندۆتیژی یا جەماوەری ب دووماهی هات
ئەڤرۆ
تیما تەپا پێی یا یانەیا دهۆك ناسناڤێ كۆپا كوردستانێ ژ دەستدا، پشتی یانەیا پێشمەرگەیا هەولێرێ شیایی ب دو گۆلان بەرانبەر گۆلەكێ سەركەفتنێ بینت ب ناسناڤێ كۆپا كوردستانێ بهێتە خەلاتكرن، د یاریا واندا ئەوا دوهی ل یاریگەها شەهید فرانسۆ حەریری ل هەولێرا پایتەخت هاتیە كرن.
د نیڤا ئێكێ دا یاریزانێن تیما یانەیا دهۆك دەست ب گڤاشتنان كرن و شیان كۆنترۆلەكا باش ل سەر یاریێ بكەن، بەرانبەر دا یانەیا پێشمەرگە ژی بزاڤێن كێم هەبوون، بەرۆڤاژی ئاستێ یاریێ و دەرئەنجامێ هێرشەكا هەڤدژ یاریزانێ پێشمەرگە هیدایەت لەتیف شۆتەكا بهێز دناڤ دەڤەرا پەنەلتیێ بۆ گۆلا موسا شوكر هاڤێت و بەری بچیتە د گۆلێ دا یاریزانێ دهۆكێ هەرێم تەحسین ب دەستی رێك ل تەپێ گرت د ئەنجامدا دادڤانی پەنەلتی هژمارت و یاریزان ب كارتا سۆر هاتە دوورئێخستن، هێرشبەرێ پێشمەرگەیا هەولێرێ عەبدوللا سەربەست شیا پەنەلتیێ ب سەركەفتیانە د خولەكا 38ێ دا گۆلا ئێكێ تۆماربكەت و تیما خوە ب گۆلەكێ بێ بەرانبەر د نیڤا ئێكێ دا ب دووماهی بینت.
د نیڤا دویێ دا سەرباری دوورئێخستنا یاریزانەكی دهۆكێ دەست ب گڤاشتنان كر و هەرزوو شیا گۆلا وەكهەڤیێ ژلایێ پیشەكارێ خوە شافیۆ مامونی د خولەكا 46ێ دا بینت، پشتی ڤێ گۆلێ ئاستێ یاریێ باشتر لێهات و هەردو تیما دەست دروستكرنا هێرشان ل سەر گۆلێن هەڤدۆ كرن، راهێنەرێ پێشمەرگە سەمیر بابۆ چەند گوهۆڕین كرن و مفای ژ كێم هژمارەیا یاریزانێن دهۆكێ وەربگریت پشتی یاریزانەك ب كارتا سۆر هاتیە وەرگرتن ئەڤ گوهۆڕینە بوونە ئەگەر گڤاشتن ل سەر گۆلا دهۆكێ زێدەتر لێبهێت و شیان د خولەكا 82ێ دا گۆلا دویێ ژلایێ یاریزانێ خوە رێكارهاشم تۆماربكەت، پشتی ڤێ گۆلێ یاریزانێن دهۆكێ ڤەگەڕیانە گڤاشتنێ ژبۆ تۆماركرنا گۆلا وەكهەڤیێ و چەندین دەلیڤەیێن گۆلێ ژ دەستدان لێ یاری ب سەركەفتنا پێشمەرگەیا هەولێرێ ب دووماهی هات و ب ناسناڤێ كۆپا كوردستانێ هاتنە خەلاتكرن.
روودانا تۆندۆتیژیا یاریگەهێ
هەرچەندە د ماوەیێ بڕێڤەچوونا یاریێ دا چەند ژ جەماوەرێن هەردو یانەیان د ناڤ پەلۆكێن یاریگەهێ دا بەرانبەری ئێك بوون و شەڕ دناڤبەرا واندا پەیدابوو تا یاری ب دووماهی هاتی ئەڤ تۆندۆتیژیە رژیانە دناڤ ئەردێ یاریگەهێ دا و هیزێن ئێمناهیێ بزاڤ دكرن كۆنترۆلێ ل سەر ڤێ روودانێ بكەت، ل دووڤ پێزانینان چەندین وەرزشڤان و جەماوەرێن وەرزشی تووشی برینێن جۆدا بوون، هەروەسان ژێدەرێن نێزیك ژ ئێكەتیا تەپا پێی دیاركر ئەڤرۆ هەتا سوبەهی دێ لژنەك هێتە پێكئینان و دووڤچوونا روودانا یاریگەها شەهید فرانسۆ حەریری هێتە كرن و دێ بڕیارێن تۆند هەبن.
بۆ زانین ئەو یانەیێن كۆپا كوردستانێ ب دەستڤە ئیناین، دهۆك ل وەرزێ 2005-2006 ب ناڤێ قارەمانیا زەیتۆن، ل وەرزێ 2006-2007 سەلاحەددین(ئارارات) بناڤێ زەیتۆن، ل 2010-2011 زاخۆ، ل وەرزێ 2012-2013 پێشمەرگەیا سلێمانی، ل وەرزێ 2013-2014 زێرەڤانیـ ل وەرزێ 2021-2022 یانەیا برایەتی.
