یانەیا ئافرەتێن دهۆكێ بوو قارەمانا قۆناغا ئێكێ
تیما یانەیا ئافرەتێن دهۆكێ ناسناڤێ قۆناغا ئێكێ ژ چارچووڤەیێ كۆما ئێكێ یا خولا فوتسالا كچێن كوردستانێ ب دەستڤە ئینا، پشتی شیایی د هەرسێ یاریێن خوە یێن خولێ ب سەركەفتیانە بینت، ژلایێ خوەڤە كچێن زاخۆ ب سێ وەكهەڤییان رێزا سێیێ د كۆما دویێ دا هات.
سەرێ لیستێ و گۆلكەرا خولێ دهۆكینە
پشتی ب دووماهی هاتنا یاریێن گەڕا سێیێ ژ هەڤڕكیێن فۆناغا ئێكێ یا كۆما ئێكێ تیما یانەیا ئافرەتێن دهۆكێ شیان ب سەركەفتن ل سەر هەر ئێك ژ چەمچەمال 3-2 گۆلان، ل سەر ڕواندز ب7-چنە، ل سەر كۆبە ب15-چنە گۆلان، هێرشبەرا وێ سیپەل شوكر ب تۆماركرنا 14 گۆلان سەرێ لیستا گۆلكەران بهێت، بڤان ئەنجامان ئافرەتێن دهۆك ب نەهـ خالان رێزا ئێكێ دهێت 25 گۆل هەنە و دو ل سەر هاتینە تۆماركرن، چەمچەمال رێزا دویێ ب شەش خالان، ڕواندز سێ خال هەنە رێزا سێیێ و كۆیە بێ خال رێزا چارێ دهێت.
كچێن زاخۆ سێ وەكهەڤی و بێ هیڤی نەبووینە
تیما كچێن یانەیا زاخۆ د هەرسێ یاریێن خوە یێن قۆناغا ئێكێ ژ كۆما دویێ ب وەكهەڤی ب دووماهی ئیناینە، پشتی دگەل هەر ئێك ژ ئافرەتێن هەولێر بێ گۆل، دگەل ئافرەتێن سۆران ب گۆلەكێ و دگەل سیروانی هەلەبچە ژی ب گۆلەكێ وەكهەڤی ئینایە و قۆناغا ئێكێ ل رێزا سێیێ هات ب سێ خالان ئەوا كچێن یانەیا سیروانی هەلەبچە ب كۆمكرنا حەفت خالان سەرێ لیستێ دهێت، ئافرەتێن هەولێر ب چار خالان رێزا دویێ و ئافرەتێن سۆران تنێ ئێك خال هەیە رێزا چارێ دهێت، لێ سێ یاریێن دی د قۆناغا دویێ دا مایە و هێشتا كچێن زاخۆ بێ هیڤی نەبووینە و دەلیڤەیا دەربازبوونێ بۆ قۆناغا چارگۆشەیا زێرین بەردەستە.
یاریێن بهێت ئەگرینن بۆ نوونەرێن پارێزگەهێ
بریارە ل ئەینییا بهێت هەڤڕكیێن گەڕا چارێ و قۆناغا دویێ یا خولی بڤی شێوەیێ بهێنە كرن، ئافرەتێن دهۆك دێ دناڤ ئەرد و جەماوەرێ خوە دا مێڤاندارییا كچێن یانەیا چەمچەمال كەن، تیما كچێن یانەیا زاخۆ دێ ل هەولێرا پایتەخت بنە مێڤانا یانەیا ئافرەتێن هەولێرێ.
