16 دەڤەرێن پیشەسازی ل هەرێما كوردستانێ دهێنە ئاڤاكرن
دهۆك، دلۆڤان ئاكرەیی:
سەرۆكێ دەستەیا وەبەرهێنانێ ل هەرێما كوردستانێ دیاركر، د چارچوڤێ پلانا كابینەیا نەهێ یا حوكمەتا هەرێما كوردستانێ دا بۆ ب هێزكرنا ژێرخانا ئابووری و پشتەڤانیا بەرهەمێ ناڤخۆیی، 16 دەڤەرێن پیشەسازی ل سەرانسەری هەرێما كوردستانێ دهێنە ئاڤاكرن و دبێژیت: ئارمانج ژ ڤی گاڤێ ئەوە، هەرێم ب كڕیار ببیتە بەرهەمهێنەر و دەلیڤەیێن كار یێن نوو بۆ گەنجان بهێنە ڕەخساندن.
دكتۆر محەمەد شوكری، سەرۆكێ دەستەیا وەبەرهێنانێ ل هەرێما كوردستانێ بۆ رۆژنامەیا ئەڤرۆ گۆت: «حكومەتا هەرێما كوردستانێ د كابینەیا نەهێ دا گرنگییەكا مەزن دایە كەرتێ پیشەسازی و بەرهەمێ ناڤخۆیی، بۆ ڤێ مەرەمێ ژی بڕیار هاتیە دان ل هەمی پارێزگەهـ و ئیدارەیێن سەربخۆ و دەڤەرداریان دەڤەرێن پیشەسازی بهێنە ئاڤاكرن، لەوما هەتا نوكە ل چەندین دەڤەران دەست ب چێكرنا وان هاتیە كرن و ئامادەكاری دهێنە كرن بۆ هندێ كو هەژمارەیەكا دی یا دەڤەرێن نوو یێن پیشەسازی بهێنە ئاڤاكرن، بڕیارە 16 دەڤەرێن پیشەسازی ل هەرێما كوردستانێ بهێنە دروستكرن».
گۆت ژی: «نوكە ل دهۆك، زاخۆ، سلێمانی، عەربەت، گەرمیان، هەلەبجە، و هندەك دەڤەرێن هەولێر، ڕاپەرین، ئاكرێ، بەردەڕەش و سۆران كار ل سەر دەڤەرێن پیشەسازی دهێتە كرن و هندەك ژ وان كار تێدا بەردەوامە و هندەكێن دی ژی ئامادەكاری دهێنە كرن دەست ب كاركرنێ بهێتە كرن، نوكە كەرتێ پیشەسازی ل هەرێما كوردستانێ یێ د گەشەكرنێ دا، دا كو بەرهەمێ ناڤخۆ بگەهیتە ئاستەكی، كو پێدڤیێن ناڤخۆ پڕ بكەت و بۆ دەرڤە ژی بهێتە هنارتن».
