18 هزار جۆرێن دەرمانان هاتینە كۆنترۆلكرن
وەزیرێ ساخلەمیێ ل حوكمەتا هەرێما كوردستانێ ئاشكرا كر، ئێك ژ وان بابەتێن ل سالێن بۆری چاكسازی تێدا هاتیە كرن، كەرتێ دەرمانان بوویە و دبێژیت: زێدەتری 18 هزار جۆرێن دەرمانان هاتینە ئەرزانكرن و كۆنترۆلكرن.
دكتۆر سامان بەرزنجی، وەزیرێ ساخلەمیا حكومەتا هەرێما كوردستانێ بۆ رۆژناما ئەڤرۆ دیاركر، شۆڕەشەكا چاكسازیێ د كەرتێ دەرمانان دا هاتیە كرن و ئەڤا ل 30 سالێن بۆری نەهاتیە كرن، ل چار پێنج سالێن بۆری هاتیە كرن و گۆت: «نوكە باوەری بۆ وەلاتیان هاتیە ڤەگەڕاندن ل دۆر كڕینا دەرمانان، هەتا پێدڤی ناكەت وەلاتی دەرمانان ژ دەرڤە بینن، ژ بەركو گوهۆڕینێن بەرچاڤ د بهایێ دەرمانان و باشتركرنا كوالێتیا دەرمانان دا هاتینە كرن».
دكتۆر سامان بەرزنجی گۆت ژی: «زێدەتر ژ 18 هزار جۆرێن دەرمانێن فەرمی د ناڤا بازاڕێن هەرێما كوردستانێ دا هەنە و هەموو ب شێوەیەكێ ئەلكترۆنی هاتینە رێكخستن و كۆنترۆلكرن، چونكی سیستەمەكێ پێشكەفتیێ جیهانی یێ دژی سەختەكرنێ دهێتە بجهئینان بۆ كۆنترۆلكرنا دەرمانان و دشێم بێژم ئێك ژ وان بابەتێن بهایێ وان گەلەك ئەرزان بووی ل ئەڤان سالێن دوماهیێ دەرمانن».
