20 هزار خێزانێن ئاوارە یێن كورد ل نەینەوا ژ قەرەبوویا مادەیێ 140 بێ بەهرن
ئاكرێ، رەمەزان زەكەریا
هژمارەكا خێزانێن كورد یێن نەینەوا كو ل سنوورێ مادەیێ 140 ئاوارە بووینە، قەرەبوویا وی مادەیی پێ ناهێتە دان و ئاگەهداركرینە كو ناڤێ هەوە د ناڤ كۆمپیوتەری دا نینە، دگەل هندێ ژی كو ب نڤیسارا فەرمی دەڤەرێن وان وەك دەڤەرێن كێشەل سەر هاتینە هژمارتن.
محەمەد كاكەیی، ئەندامێ جڤاتا پارێزگەها نەینەوا بۆ ئەڤرۆ گۆت: نێزیكی 20 هزار خێزانێن كو ئاوارەیێن گوندێن دەوروبەرێن دەڤەرداریێن حەمدانیە، باشیك و ناوچەداریا بەرتلە بۆن دەمێ ڤیاین قەرەبوویا مادەیێ 140 وەربگرن، ئاگەهدار كرینە كو ناڤێ وان د لیستا قەرەبووكرنێ دا نینە و پێدڤی بوو بەری نوكە هەبا، ئەو خێزان كوردێن كاكەیی و شەبەك و ئێزیدینە پتر ژ 27 گوندێن وان دەڤەران ئاوارە بووینە، ل دووڤ مادەیێ 140 هەر ئاوارەیەك 10 ملیۆن دیناران و عەرەبێن هاوردە 20 ملیۆن دیناران وەك قەرەبوو وەردگرن.
ناڤبری گۆتژی: ب نڤیسارا فەرمی ب رێكا جڤاتا پارێزگەهێ داخواز ژ لیژنا بلندنا مادەیێ 140 كریە ئەو دەڤەرە بهێنە دیاركرن كو مادە ل نەینەوا وان ڤە دگریت و ئەو دەڤەر ژی تێدانە یێن كو ئەو وەلاتیێن كورد ژێ ئاوارە بووین.
ناڤهاتی گۆت: نڤیسار ل 30 تشرینا دویێ یا 2025 ژ لایێ سكرتێرێ گشتی یێ لیژنا مادەیێ 140 ئاراستەی جڤاتا پارێزگەهێ هاتیە كرن و ناڤێ وان دەڤەرێن نەینەوا دیار كریە یێن كو مادەیێ 140 وان ڤە دگریت، كو پێكدهێن ژ دەڤەرداریا شنگال و ناوچەداریێن وێ، دەڤەرداریا شێخان و ناوچەداریێن وێ، حەمدانیە و ناوچەداریێن وێ، تلكێف و ناوچەداریێن وێ، ئاكرێ و ناوچەداریێن وێ، مەخموور و ناوچەداریێن وێ، دگەل ناوچەداریێن بەعاج، زووممار و قەحتانیە.
