2+2=1
چنار ئەحمەد
د دەمەكی دا كو ئەم د گەرمیا بانگەشەیا هەلژارتنان داینە و كارتێكرنا ڤێ گەرمێ هەموو گۆڕەپان ڤەگرتینە، پێدڤیە ئەم لسەر بنەمایێن نەتەوایەتی یێن مەزن راوەستین، نە بتنێ هەلبژارتنان بكەینە ئالاڤەك بو نەخشەكێشان و ب دەستڤەئینانا پلە و پوستان بەلكو دگەل ڤێ چەندێ هەلگرێن پەیامەكا كویرتربین كو ببیتە ئەگەرێ ژدایكبوونا كوردستانا مەزن.
د هەر هەلكەفتەكا نەتەوایەتی و سیاسی دا بیرا من ل وەسیەتا پێشەوا (قازی محەمەد)دهێت كو گەلێ كورد ماوەیەكێ زۆرە لسەر دەستەواژەیەكا نەتەوایەتی راوەستیاینە و كریە هێمایێ كوردینییێ وەكی سەركردەی گۆتی (٢+٢=١) ئەڤە بتنێ هاوكێشەكا بیركاری نینە بەلكو كورتكرنا فەلسەفەكا دیرۆكی یە و ئاماژەیە بو پارچەبوونا كوردستانێ و هژمارە (١) رامانانەكا نەگهۆڕە بو ئێكرێزیێ كو ئەم خودانێن ئێك گەل و ئێك نشیتیمانین ودەمێ ئەم د بازنێ سیاسەتا نافخۆ و ركابەریا هەلبژارتنان دا پێدڤیە ڤێ هاوكێشێ بكەینە ئاراستە و وەسیەتا سیاسەتا خۆ ژی.
ئەركێ ڤێ قوناغا هەلبژارتنان ئەوە كو ئێدی نەبیتە ركابەریەكا حزبی و بێ ئەنجام و ببیتە ئەگەرێ كورتركرنا برینا دوبەرەكیێ بەلكو ببیتە رێخوشكەرەك ژبو هندێ كی باشترین ئامرازە بو گەهشتنا وێ (١) ا مەزن (دەولەتا سەربەخۆ) ئەڤە خەونەك نینە ژبو خوشكرنا بەرپێن حزبەكێ یان چەند حزبەكان بەلكو خەونا هەموو كوردەكی یە و باشترە بەربژارێن مە پرۆژە یێن خۆ د چارچوڤێ دیتنەكا مەزنتر و ئێكگرتی و دەم درێژتر دا راگەهینن نە بتنێ چاڤ ل دەستكەفتێن دەمكی بن.
بلا ئەڤ هەلبژارتنە ببنە دەسپێكەك بو رەتكرنا وێ سیاسەتا بچووك یا بزاڤا دابەشكرنا خەلكی و ژێك دابرینا وان ددەن و ببیتە مۆرەكا باوەرپێكری و وێ فەلسەفا مەزن مۆر بكەت ئەڤا دبێژیت: بو گەهشتن بو ئێكرێزی و سەربەخوییێ پێدڤێە ٢+٢ بكەینە ١.
