22/2/2022ێ پرانیا نه‌خۆشخانێن دایكبوون هاتینه حجزكرن
دهۆك، نه‌وزاد هلۆری:
هه‌ر چه‌نده ژ روویێ ساخله‌میی و جڤاكی چوو رامانێن ئێكلاكه‌ر نینن، به‌لێ پشكه‌كا هه‌ری زور یا وان ژنێن كو دخوازن زارویێ خوه بینن ژیانێ یان وان كچ و كورێن دخوازن ژیانا هه‌ڤژینیێ پێكبینن ژڤانێن خوه كرینه د ئه‌ڤرۆ دا.
یاسین محه‌مه‌د، ماموستا ل قوتابخانه‌كا ده‌ڤه‌را بارزان ل سه‌ر بابه‌تی گۆت: (ژ روویێ جڤاكی ڤه ئینانه پێش و پاش یا دایكبوون یان داوه‌تێ چوو كارتێكرن نینه، به‌لێ ژ روویێ ده‌روونی ڤه ئه‌و كه‌سێن ڤێ یه‌كێ كه‌ن دلخوش دبن و دل و ده‌رونێ وان ئارام دبیت، بێگومان ئه‌ڤ یه‌ك تشته‌كێ ئاساییه ب مه‌رجێ ئه‌گه‌ر كارتێكرنێن ساخله‌میێ بۆ وان دایك و زارویان نه‌بن كود هێنه ژیانێ).
زێده‌تر گۆت: (پشكه‌كا هه‌ری زور یا وه‌لاتێن جیهانێ ئه‌ڤ یه‌ك دناڤ دا هه‌یه و ل ڤان چه‌ند سالێن دوماهیێ ئه‌ڤ یه‌ك ل كوردستانێ ژی دهێته دیتن، باشترین شێواز بۆ داوه‌تێ و دایكێ ژی ده‌ما كو بخوازن ده‌ست ب ژیانه‌كا نوو بكه‌ن ئه‌وه كو هه‌موو د ئارام و دلخوش بن و چوو كارتێكرنێن دارایی و ساخله‌میی و جڤاكی ل سه‌ر نه‌بن، به‌لێ زێده‌گاڤی ل سه‌ر ڤێ یه‌كێ ب تشته‌كێ باش نابینم بۆ نموونه پاره‌كێ زور بهێته‌دان كو داوه‌كێ بینن ڤان روژان دا یان كارتێكرن ل سه‌ر ساخله‌میا دایك و زارویێ وان بكه‌ت).
ب گوره‌ی هنده‌ك پێزانینان ل پارێزگه‌ها دهۆكێ ل هنده‌ك ژ هولێن داوه‌تان هه‌تا دوو هزار دولار و پتر ژی هاتیه‌دان داكو تنێ داكو داوه‌تا وان بكه‌ڤیته د رۆژه‌كا دیروكی و جوان دا.
د.ره‌مه‌زان كوچه‌ر، رێڤه‌به‌رێ نه‌خۆشخانا كوردستان یا ئافره‌ت و زاروكبوونێ ل دهۆكێ بۆ ئه‌ڤرۆ گۆت: (داكو ژڤانێ دایكبوونا زارویێن خوه بینن پێش یان پاش و بكه‌ڤیته ئه‌ڤرۆ رێكه‌فتی 22/2/2022ێ دا هه‌موو ته‌ختێن نه‌خۆشخانا مه هاتینه حجزكرن ژلایێ وان ژنێن كو دوو گیانن و دخوازن زارویێ خوه بینن ژیانێ).
زێده‌تر گۆت: (ژروویێ ساخله‌میێ ڤه نوژدارا تایبه‌تمه‌ند دێ بریارێ ل سه‌ر ده‌ت كا ئه‌و ژنا دوو گیان چه‌ند رۆژان بینیت پێش یان پاش ب مه‌رجێ كارتێكرنێ ل سه‌ر ژیانا دایكێ و زارویێ وێ نه‌كه‌ت ژ نوو بریار دهێته‌دان كوپ ێش و پاش بۆ بهێته دیاركرن ب گوره‌ی ره‌زامه‌ندی یا وێ، دڤێ رۆژێ دا ئه‌م وه‌كو نه‌خۆشخانا كوردستان ژورێن زارویان دخه‌ملینین و دیاریان ژی ل سه‌ر زاروی و دایكا وان دابه‌ش دكه‌ین، چوو گورانكاریان ژی ل بهایێ وان ناكه‌ین، به‌روڤاژی ئینانه پێش و پاش یا ژڤانێ ژ دایكبوونێ بو نموونه بینن ئه‌ڤرۆ بومه كارتێكرن هه‌یه و شولێ مه و بارێ مه گرانتر لێ دكه‌ت، به‌لێ د پێناڤ به‌خته‌وه‌ربوونا دایك و بابێن وان ئه‌م نه‌چارین ئه‌ڤی بارێ گران راكه‌ین و باشترین شێوه خزمه‌تا وان بكه‌ین).
