28 ملیار دینارێن پرۆژه‌یێن قه‌زا شنگال دیار نینن
ئه‌ڤرۆ، دووڤچوون:
قایمقامێ قه‌زا شنگال راگه‌هاند، كوژمێ 28 ملیار دیناران بۆ شنگال هاتبوونه ته‌رخانكرن و لیژنه‌ك بۆ ئاڤادانیا شنگال هاتبوو پێكئینان، لێ هه‌تا نوكه ژی ئه‌ڤ كوژمێ پاره‌ی نه‌هاتیه مه‌زاختن و ل دووڤ زانیاریان ژی ئه‌ڤ كوژمێ پاره یێ هاتیه ته‌جمیدكرن و گۆت: ئه‌و پارێ دهێته ته‌رخانكرن ژی گه‌له‌ك كێمه و ل گۆر وێ جینوسایدا ب سه‌رێ خه‌لكێ شنگال هاتی پێدڤیه گرنگیه‌كا مه‌زن ل شنگال بهێته دان.
نایف سه‌یدۆ، قایمقامێ قه‌زا شنگال ب وه‌كاله‌ت بۆ ئه‌ڤرۆ دیار كر، ئه‌ڤ كوژمێ پاره‌ی نه‌هاتیه مه‌زاختن و چو پرۆژه نه‌هاتینه بجهئینان، ب تایبه‌تی ژی ئه‌و پرۆژه‌یێن لژنا ئاڤه‌دانیا شنگال ئێك پرۆژه ژی بجه نه‌هاتیه، ب تنێ ل سه‌ر وه‌رقه‌ی پاره هاتیه ته‌رخانكرن، وه‌كو دیتر ل سه‌ر ئه‌ردی چو پرۆژه نه‌هاتینه بجهئینان، ب تنێ ئه‌م دزانین پاره یێ هاتییه ته‌جمیدكرن و پرۆژه بجهنه‌هاتیه، ئه‌م ژی ئه‌گه‌ران نزانین”.
قایمقامێ قه‌زا شنگال ئاشكه‌را كر: “شنگال پشكه‌كه ژ عیراقێ و هه‌موو ده‌ڤه‌رێن عیراقێ گازنده ژ كێماتیا پرۆژان دهێنه كرن، ل شنگال ژی گازنده هه‌نه و پرۆژه نینن، شنگال ل سالا 2014ێ تووشی مه‌زنترین جینۆساید بوویه و هه‌تا نوكه ژی وه‌كو پێدڤی گرنگی ب شنگال نه‌هاتیه دان”.
ئاماژه دا وێ چه‌ندێ ژی: ئه‌و پارێ دهێته ته‌رخانكرن ژی گه‌له‌ك كێمه و ل گۆر وێ جینوسایدا ب سه‌رێ خه‌لكێ شنگال هاتی پێدڤیه گرنگیه‌كا مه‌زن ل شنگال بهێته دان ل وارێ خزمه‌تگوزاریدا، ژ به‌ر كو شنگال پێدڤی ب ئاڤاكرنا قوتابخانا و نه‌خۆشخانا و بنگه‌هێن ساخله‌می و جادا و پرۆژه‌یێن ئاڤێ هه‌یه.
شنگال ل سالا 2014ێ تووشی جینۆسایدێ بوو و پتر ژ 80% هاتیه وێرانكرن و هه‌موو خه‌لكێ شنگال ئاواره بوون و هه‌تا نوكه ژی خه‌لكێ شنگال ژبه‌ر نه‌بوونا خزمه‌تگوزاریان و نه‌بوونا ته‌ناهی، نه‌شیاینه ڤه‌گه‌رنه شنگال و ئه‌ڤه پتر ژ حه‌فت سالن خه‌لكێ شنگال دناڤ كه‌مپان دا ژ ده‌ڤه‌ری كه‌مپان ل سنورێ پارێزگه‌ها دهۆكێ ژیانا خۆ دبۆرینن.
بابیر شنگالی، سه‌رۆكێ باژێرڤانیا قه‌زا شنگال خویا كر، گه‌له‌ك جاران به‌غدا سۆز داینه خه‌لكێ شنگال بۆ ئاڤه‌دانیێ و دابینكرنا ته‌ناهیێ ل شنگال، لێ هه‌تا نوكه ژی ره‌وشا شنگال باش نینه و خزمه‌تگوزاری نینن، له‌ورا ژی ئاواره نه‌شێن بچنه شنگال و ئه‌و گوندێن عه‌ره‌بان یێن سالا 2014ێ بووینه داعش و هێلینا داعشان هه‌موو ئاڤاكرینه و خه‌لك ناڤ مالێن خۆدانه، لێ ده‌ڤه‌را شنگال هاتیه وێرانكرن و هێشتا نه‌هاتیه ئاڤاكرن و خه‌لك نه‌شێن ڤه‌گه‌رنه ناڤ خانیێن خۆدا”.
ئاماژه دا وێ چه‌ندێ ژی: هه‌تا پێشمه‌رگێ كوردستانێ نه‌زڤریته شنگال، ئه‌ز دبینم شنگال ناهێته ئاڤه‌دانكرن، ب تنێ شنگال دێ ل سه‌ر ده‌ستێن حۆكمه‌تا هه‌رێما كوردستانێ هێته ئاڤه‌دانكرن، له‌ورا ژی خه‌لكێ شنگال چاڤه‌رێنه پێشمه‌رگه بزڤریته شنگال، دا كو ئاڤه‌دانی ده‌ست پێ بكه‌ت ب هیڤیا به‌غدا ڤه بۆ شنگال چو ناهیته كرن”.
