50% ژ وه‌لاتیان هه‌لگرێن نه‌خۆشیا شه‌كرێ نه بێ هه‌ست پێ بكه‌ن
دهۆك، له‌زگین جوقی
رێڤه‌به‌رێ كلینیكێن نه‌خۆشیا شه‌كرێ ل ساخله‌میا پارێزگه‌ها دهۆكێ دیار كر: ل پارێزگه‌ها دهۆكێ ده‌ست ب هه‌وه‌كا هشیاریا وه‌لاتیان هاته كرن، ژبه‌ر نه‌خۆشیا شه‌كرێ ئه‌ڤ نه‌خۆشیا یا زێده‌بیت د ناڤ خه‌لكی دا و 32 هزار كه‌س ل دهۆكێ تووشی نه‌خۆشیا شه‌كرێ بووینه.
د. بلند به‌یار، رێڤه‌به‌رێ كلینیكێن نه‌خۆشیا شه‌كرێ ل ساخله‌میا پارێزگه‌ها دهۆكێ دیار كر، ل پارێزگه‌ها دهۆكێ 32 هزار كه‌س تووشێ نه‌خۆشیا شه‌كرێ بووینه و ل جیهانێ نێزیكێ 400 ملیۆن كه‌سان تووشێ نه‌خۆشیا شه‌كرێ بووینه. هه‌ر ده‌ه گه‌نجان ئێك ژی هه‌لگری نه‌خۆشیا شه‌كری یه و پێشبینی دهێته كرن ل سالا 2030ێ هه‌ر 9 كه‌سان ئێك ژی هه‌لگرێ نه‌خۆشیا شه‌كری بیت”.
ئاماژه دا وێ چه‌ندێ ژی: ل سه‌رانسه‌رێ جیهانێ رۆژا جیهانیا نه‌خۆشیا شه‌كرێ دهێته ساخكرن و ل پارێزگه‌ها دهۆكێ ژی چه‌ندین چالاكی دهێنه ئه‌نجامدان، ژ وانا ژی دناڤ كه‌مپا دومیز یا په‌نابه‌رێن رۆژئاڤایێ كوردستانێ و ل زانكۆیا دهۆكێ د ناڤ بازارێ دهۆكێ دا ل قه‌زا و ناحیا ژی چالاكی بۆ پتر هوشیاریا وه‌لاتیان دهێنه ئه‌نجامدان”.
ئاشكرا كر: خوارنا نه‌ساخله‌م و قه‌له‌ویێ و نه ئه‌نجامدانا وه‌رزشێ و چه‌ندین ئه‌گه‌رێن دی هه‌نه دبنه ئه‌گه‌رێ په‌یدابوونا نه‌خۆشیا شه‌كرێ، رێژا تووشبوونێ رۆژ بۆ رۆژێ به‌ره‌ڤ زێده‌بوونێ یه و 50% ژ وه‌لاتیان هه‌لگرێن نه‌خۆشیا شه‌كرێ نه، بێ هه‌ست پێ بكه‌ن، له‌ورا ژی ئه‌ڤرۆ هه‌وه‌كا مه‌زن یا پشكنینێن بێ به‌رامبه‌ر بۆ وه‌لاتیان دهێنه ئه‌نجامدان دا كو خه‌لكێ خۆ ب پارێزین”.
د. بلند به‌یار ئه‌و ژی دیار كر، ل دهۆكێ 32 هزار كه‌س تووشی نه‌خۆشیا شه‌كرێ بووینه، ژ وان ژی 25 هزار كه‌س ئاكنجیێن دهۆكێ نه و حه‌فت هزار ئاواره و په‌نابه‌ر تووشی نه‌خۆشیا شه‌كرێ بووینه. ئه‌ڤ ساله 100 هزار كه‌سان سه‌ره‌دانا ده‌زگه‌هێن ساخله‌میێ كرینه بۆ ئه‌نجامدانا پشكنینان و وه‌رگرتنا چاره‌سه‌ریا نه‌خۆشیا شه‌كرێ “.
