56 قوتابی هاتنه خه‌لاتكرن
ئه‌ڤرۆ نیوز:
ب چاڤدێریا فه‌رهاد ئه‌مین ئه‌تروشى پارێزگه‌رێ دهوكێ وب ئاماده‌بونا به‌رێز عمر على ته‌ها رێڤه‌به‌رێ گشتى یێ په‌روه‌ردێ وسه‌میانێن قوتابییان رێ ورسمێن خه‌لاتكرنا 56قوتابیێن سه‌ركه‌فتیێن ئێكێ یێن قوناغا 12ێ ئاماده‌یى و9ێ بنه‌ره‌تى ل سه‌ر ئاستێ پارێزگه‌هێ هاتنه گێران.
لبه‌راهیێ رێڤه‌به‌رێ گشتى یێ په‌روه‌ردێ په‌یڤه‌ك خاند وگوت: ئه‌ڤ رێ و رسمه د هێنه گێران وه‌كو هانده‌ره‌ك بوو قوتابێن دى كو چاڤ ل قوتابێن سه‌ركه‌فتی بكه‌ن و سوپاسیا پارێزگه‌رێ دهوكێ و هه‌می فه‌رمانگه‌هێن حكومه‌تێ كر هه‌مبه‌ر ئه‌و پشته‌ڤانییا بو په‌روه‌ردێ و قوتابییان دكه‌ن و پیروزباهییا هه‌ر 56 قوتابێن سه‌ركه‌فتیێن ئێكێ ل سه‌ر ئاستێ پارێزگه‌هێ كر كو دوو ژ وان ل سه‌ر ئاستێ هه‌رێمێ نمرێن بلند ب ده‌ستڤه ئیناینه , هه‌روه‌سا پیروزباهى ل سه‌میانێن هه‌مى قوتابیێن سه‌ركه‌فتى كر.
رێڤه‌به‌رێ گشتى یێ په‌روه‌ردێ ته‌كه‌ز كر كو ئه‌ڤ ساله رێژا ده‌رچوونێ ل سه‌ر ئاستێ زانستى و وێژه‌یی دوو جاران باشتره ژ سالا خاندنێ یا ده‌رباز بووی و ده‌ستخوشى ل هه‌موو رێڤه‌به‌رێن په‌روه‌ردا و ماموستا و قوتابییان و سه‌میانێن وان كروخواست كو هه‌موو خو ب وه‌ستینن ولسالا نوو یا خاندنێ رێژێن سه‌ركه‌فتنێ یێن باشتر بده‌ست ڤه بینن.
هه‌ر ب ڤێ هه‌لكه‌فتێ پارێزگه‌رێ دهوكێ په‌یڤه‌ك پێشكێشكر و بناڤێ خو وكارگێریا پارێزگه‌هێ پیروزباهییا هه‌موو قوتابیێن سه‌ركه‌فتى ل سه‌ر ئاستێ كوردستانێ و پارێزگه‌هێ كر.
هه‌روه‌سا گوت: پار سال رێژه‌یا سه‌ركه‌فتنێ بدلێ مه نه‌بوو به‌لێ ئه‌ڤ ساله رێژه باشتره وهیڤى خاستن دووڤچونا پروسا په‌روه‌ردێ یا به‌رده‌وام بیت و خواست سالێن بهێت رێژه‌یا سه‌ركه‌فتنێ باشتر بیت وقوتابى بشێن پلێن بلندتر بده‌ستڤه بینن وب تایبه‌تى قوتابیێن پشكێن زانستى نمرێن پتر بده‌ستڤه‌بینن بو وێ یه‌كێ ژمارا قوتابییان ل كولیژێن نوژدارى وئه‌ندازیارى بهێنه وه‌رگرتن بو خزمه‌تكرنا خه‌لكێ پارێزگه‌هێ و كوردستانێ.
ل دوماهیێ پشتگیریا پارێزگه‌هێ بو پروسا په‌روه‌ردێ نیشان دا و هیڤی خاستن حكومه‌تا نوو وب رێكا وه‌زاره‌تا په‌روه‌ردێ پتر گرنگیێ بده‌ته سه‌كته‌رێ په‌روه‌ردێ .
پاشی رێ وره‌سمێن خه‌لاتكرنێ هاتنه گێران و خه‌لاتێن پارێزگه‌رێ دهوكێ وپه‌روه‌ردێ ل سه‌ر سه‌ركه‌فیێن ئێكێ هاتنه به‌لاڤ كرن.
