75 ژن و زارۆك ل شكەفتا دەكان ل دەڤەرا مزویریان هاتنە سۆتن
سالار محەمەد دۆسكی:
ئێك ژ تاوانێن هوڤانەیێن رژێما بەعس یا ژناڤچوویی دژی خەلكێ گوندێ دەكان ل دەڤەرا مزیریا هاتیەكرن تاوانا شكەفتا دەكان بوویە، پتر ژ نیڤ چاخی ل سەر روودانێ دەرباز بووینە بەلێ هەتا نوكە دبیردانكا خەلكێ دەڤەرێ دا زندی مایە.
سەلیم دەكانی ئێك ژ پێشمەرگەیێن كوردستانێ یە و هەمان دەم موختارێ گوندێ دەكان بۆ رۆژنامەیا ئەڤرۆ گۆت: رێكەفتی 18/8/1969ێ دەسپێكا دەستهەلاتا رژێما بەعسا گور بە گورە ل ئیراقێ ب بریارا سالح مەهدی عەماش وەزیرێ ناڤخوە یێ وی دەمی ل ئیراقێ و ب سەركردایەتیا مەیدانیا عەبدولجەبار ئەسەدی فەرماندەیێ وی دەمیێ فرقا چار یا سۆپایێ ئیراقێ، ب هاریكاریا چەتان و ل عەرد و ئەسمانی و ب فرۆكە و چەكێن جودا هێرشەكا بەرفرەه ئینا سەر دەڤەرێن ئاكرێ و شێخان، هێرشێ پتریا دەڤەرا شێخان و ناڤ كورێ و شەمكان و چەندین گوندێن ئاكرێ ڤەگرتن و ل دەسپێدێ توپ بارانەكا دژوار هاتەكرن، و خەلكێ گوندێ دەكان ژی مینا هەمی گوندێن دەڤەرێ بۆ خوە پاراستنێ قەستا شكەفتا پشتا گوندی كر.
ئەحمەد رەمەزان، خەلكێ گوندێ دەكانە، ل دور روودانێ دبێژیت: ل وێ هێرشا بەرفرە نێزیكی 18 كەسان شەهید بوون و پشتی ڤێ چەندێ حوكمەتێ و چەكدارێن ب سەر ڤە كەربو كینەكا مەزن ل دەڤەرێ هەلگرت، شكەفت نێزیكی كانیێ بوو ل پشتا گوندی بوو، خەلكێ گوندی ب شەڤێ دهاتنە خانیێ خوە دا ل ناڤ گوندی و ل سپێدەهیان هەر ئێك هەر زووی دا زارۆكێن خوە بەت و قەستا شكەفتان كەت، و گوند هەمی دهاتە بەردان چونكە پتریا جاران رۆژێ دو جاران فرۆكە دهاتن و توب دهاڤێتنە گوندی و كەسەك نەدشیا ل گوندی ب ژیت لەوما سپێدێ بەری رۆژهەلاتی دایكێن مە دا زارۆكێن خوە كوم كەن و قەستا شكەفتان كەن، بنەمالا مە هەشت شەهید دڤێ روودانێ دا داینە دو دایكێن مە ب زارۆك ڤە هاتینە سوتن و سێ برا و سێ خویشك دشكەفتێ دا هاتە سوتن.
سەلیم دەكانی موختارێ گوندێ دەكان گۆتژی: كارەساتا ل گوندی دروست بووی گەلەك یا مەزن بوو و قوربانی هەمی ژن و زارۆك بوون و ل ڤێ شكەفتێ ل سەر دەستێ رژێما بەعس هاتنە شەهیدكرن و 76 كەس بوون و 75 كەس شەهید بوون و ژنەك ڤێ روودانێ دا رزگاربوو.
موختارێ گوندی هەروەسا گۆت: پشتی تۆبارانكرنێ هێرشا پیادە یا دوژمنی ب سەر گوندی دا هات پشتی زانی خەلكێ گوندی ب ژن و زارۆك ڤە دناڤ شكەفتێ دا ئاكنجی بووینە گوللەبارانا شكەفتێ كر، و ل بەر دەرگەهێ شكەفتێ كەپرێن چلی هەبوون و ئاگر بەربوو ئەوان كەپران و ل سەر دەرێ شكەفتێ دا هاتن، دەنگ و نالین و قێژیێن برینداران ل گەل قێریا ئافرەت و زارۆكان و دەنگێ گولەیان ئاگرەكێ بێ دلوڤانی تەڤلی هەڤ بوون.
موختارێ دەكان زێدەتر گۆت: ژ بەر فرۆكان و پاراستنا گیانی خەلكی قەستا شكەفتێ كربوو و دەمێ گوللە بەرداینە شكەفتێ و كەپر هاتینە سۆتن خەلكی قەستا دووماهی یا شكەفتێ كر، و ئاگر بەربوو چلی و ئێدی دیكێل گەلەك چوو دناڤ شكەفتێ دا و ژن و زارۆك خەندقین و سۆتن .
فاتما عیسا، شەهیدەكا زندی یا ڤێ روودانا هۆڤانەیە و هەتا ئەڤرۆ ژی شینوارێن سۆتنێ ل سەر لاشێ وێ د دیارن، ئەو كارەسات شەڤانە دهزر و مێشكێ وێ دا دزڤریت دبێژیت: ژ بەر هاتنا فرۆكان و تۆبارانكرنێ ئەم وەك خەلكێ گوندی مە قەستا شكەفتێ كر، و هەمان دەم لەشكرێ رژێمێ ژی سەر ب دەڤەرێ دا گرت و بۆ پاراستنا گیانێ خوە مە قەستا شەفتێ كر، و مە ئاگەه ژ زەلامان نەبوو و چەندین رۆژان ئەم ماینە شكەفتێ دا.
نەوزاد دەكانی، خەلكێ گوندی یە دبێژیت: دەمێ لەشكرێ رژێمێ رەمی ل شكەفتێ كری، ل بەر دەرگەهێ شكەفتێ هەمی كەپر بوون، و هەمی ئاگر بەر بوویێ و بوو گوری و چەندین خێزانێن خەلكێ گوندی ژ ژن و زارۆكان تێدا هاتنە سۆتن و شەهیدكرن، پتری زارۆك بوون و دەمێ هاتینە سۆتن هندەك ژ ئەوان ژن و زارۆكان بتنێ كلوخێ سەرێ وان مابوو، و لەشێ وان هەمی حەلیان بوون.
موختارێ گوندێ دەكان، زێدەتر گۆت: دڤێ تاوانا هوڤانەدا 75 كەس هاتنە سۆتن و شەهیدكرن و هەتا ئەڤرۆ ژی ئەڤ تاوانا مەزن ل بیردانكا خەلكێ گوندێ دەكان دا زندی مایە، جەنازێن ئەڤان ژن و زارۆكان 10 بۆ 12 رۆژان مان هەتا هێزەكا پێشمەرگەی هاتیە دەڤەرێ و چەند چالەك ل نێزیك شكەفتێ كولاینە و ئەڤ جەنازە ڤەشارتینە.
موختارێ گوندێ دەكان ئەو ژی گۆت: پشتی بورینا نیڤ چاخی نوكە شكەفتا دەكان ل سەر دەستێ حوكمەتا هەرێما كوردستانێ دبیتە پرۆژە موزەخانەیەك، ژ چێكرنا رێكا پیادە و سەخبێركرنا دەردورێن شكەفتێ و چێكرنا مونومێنتەكێ بۆ شەهیدێن ڤێ روودانێ ب خوە ڤەدگریت و ئەڤ كارە دهێتەكرن وەك رێزگرتن بۆ گیانێ ئەڤان شەهیدان، دیسا ئەڤ جهە دێ بیتە جهەك كو ل پاشەرۆژێ نڤیسكار و ڤەكولەر سەرەدانا ڤی جهی بكەن، و ڤێ دیرۆكێ ب چاڤێن خوە ببین و دیسا ڤەكولین ل سەر بهێنە ئەنجامدان و ئەڤە رێزگرتنە ل شەهیدێن گوندێ مە و تەڤایا شەهیدێن رزگاری خوازا گەلێ كوردستانێ و ئەڤ مونومێنتە دێ بیتە بەلگەیەك بۆ ڤێ تاوانا هوڤانە یا رژێما بەعس دژی خەلكێ گوندێ دەكان ئەنجامدایی .
مراز ئەحمەد، ئەندازیارا پرۆژەی دبێژیت: ل سەر بودجا پارێزگەها دهۆكێ بۆدجە گەشەپێدانێ كوژمێ226 ملیون و 200 هزار دینار بۆ ئەنجامدانا ڤی پرۆژەی هاتینە تەرخانكرن و ماوێ پرۆژەی 180 رۆژێن كاری نە و پرۆژە ژ شەش قوناغا پێك دهات و قوناغا ئێكێ ڤەكرنا رێكێ بوو و گەلەك یا بزحمەت بوو و 11/12/2024 دەست ب پرۆژە هاتیەكرن و زەحمەتی ئەو بوویە رێك هەمی بەر بوو و كەڤر بوو و گەلەك ب زەحمەت بوو ترۆمبێل گەهشتینە وێرێ و درێژاهی یا رێكێ 200 مەتر بوو هەتا ئەم گەهشتینە دەرێ شكەفتێ و 75 مەترێن دی ژی ب هەمان شێوە، قوناغا دووێ چێكرنا دیوارەكێ راگر بوو ئەڤە بۆ چ بوو بۆ بەر دەرگەهێ شكەفتێ ئەڤە بۆ ساخكرنا بیروەریا و چالاكیان ڤێ روودانا دل تەزین، قوناغا سیێ دانانا بەرێ عەردی بوو و ئەڤ قوناغە ژی نوكە بەرەف دووماهیێ چوویە، و تشتێ گرنگ ئەو بوویە هەر بەرێ دەڤەرێ هاتیە بكارئینان و ئەڤە بۆ پاراستنا ناسناما دەڤەرێ بوویە، قوناغێن چارێ و پێنجێ هندەك قوناغێن جودانە، قوناغا دووماهیێ ئەم گەهشتینێ قوناغا دیزاینا مونومێنتێ بوویەو ب زووترین دەم دێ كەڤیتە دبیاڤێ بجهئینانێ دا.
نەوزاد دەكانی، زێدەتر گۆت: حوكمەتا هەرێما كوردستانێ كێمتر خەمی نەكریە بۆ ئەنجامدانا ئەڤی پرۆژەی، گورێن ئەڤان شەهیدان دێ هێنە دروستكرن و ئەم گەلەك سوپاسیا حوكمەتێ دكەین.
موختارێ گوندێ دەكان، زێدەتر گۆت: جەنازێن ئەڤان شەهیدان دێ هێنە ڤەشارتن و كێلی و ناڤونیشان دێ ل سەر هێنەدانان و ئەم سوپاسیا حوكمەتا هەرێ ما كوردستانێ دكەین، شكەفتا دەكا ئێك ژ سەدان نموونەیێن قوربانیدانا خەلكێ كوردستانێ یە كو ل پشت خوە رامانەكا مەزن هەلدگریت.
ل دووماهیێ ئەحمەد رەمەزان، خەلكێ گوندێ دەكان، داخاز ژ حوكمەتا هەرێما كوردستانێ كر كو دووبارە گوند بهێتە ئاڤاكرن، و بۆ هەر خێزانەكێ خانیەك بهێتە دروستكرن و هولەكا رێورەسمان هاتبا دروستكرن دا مفا ژێ هاتبا وەرگرتن.