83% وەبەرهێنەرێن ل هەرێمێ خۆجهن و پڕۆژەیێن مەزن دێ هێنە ئەنجامدان
دهۆك، دلۆڤان ئاكرەیی:
سەرۆكێ دەستەیا وەبەرهێنانێ ل هەرێما كوردستانێ دیاركر، سەرەڕای وان هێرشێن نەرەوا یێن ژ لایێ گرۆپێن تیرۆریستی ل ئیراقێ بۆ سەر باژێڕ و دەڤەرێن جودا یێن هەرێمێ، بەلێ پرۆسەیا وەبەرهێنانێ رانەوەستیایە و وەبەرهێنەر د كار و پڕۆژەیێن خۆ دا بەردەوامن و دبێژیت: هەرێما كوردستانێ هێشتا وەكو دەڤەرەكا ئارام و پڕی دەرفەت دهێتە دیتن و پاراستنا ڤێ ئارامیێ ل نك مە یا گرنگە.
د. مەحەمەد شوكری، سەرۆكێ دەستەیا وەبەرهێنانێ ل هەرێما كوردستانێ بۆ رۆژنامەیا ئەڤرۆ گۆت: «پلان و مەرەما مە یا سەرەكی ئەوە، ئەم پشتگیریێ ل وەبەرهێنەرێن خۆ یێن ناڤخۆیی بكەین، چونكی پتر ژ 83% وەبەرهێنەرێن ل هەرێما كوردستانێ، وەبەرهێنەرێن ناڤخۆیی و لۆكالینە».
سەرۆكێ دەستەیێ زێدەتر گۆت: «سەرۆكێ حوكمەتێ مەسرور بارزانی پشتەڤانیا تەمام یا حكومەتێ بۆ وەبەرهێنەرێن ناوڤخۆیی دوپاتكریە، دا كو بشێن پشكداریێ د پڕۆژەیێن مەزن و ستراتیژی یێن پاشەرۆژێ دا بكەن، مە داخوازی ژ وان كریە وەكو گرۆپێن كارا و پێكڤەیی، هێزەكا ئابووری یا بهێزتر ل هەرێما كوردستانێ دروست بكەن و وەبەرهێنانێ د سێكتەرێن جودا و ب تایبەتی د ئاڤاكرنا كارگەهێن مەزن دا بكەن».
