90% یێن تووشی فشارا خوینێ دبن چ نیشان ل دەف پەیدانابن
بەرپەرێ ساخلەمیێ:
د.مجید حسێن دۆسكی، تایبەتمەندێ نەخۆشیێن دل و هناڤا دیاركر كو هەر كەسەكێ ئاسایی فشارەكا خوینێ یا هەی و گۆت: فشارا سەری 10-14 نورمالە و یا بنی ژی 6-9ێ یە و هەكە یێ سەری ژ 14 و یێ بنی ژ 9ێ دەربازبوون ئەم هینگی دبێژین وی كەسی نەخۆشیا فشارا خوینێ یا هەی.
ل دۆر ئەگەرێن بلندبوونا فشارا خوینێ، د،مجید حسێن دۆسكی دیاركر، 90% بێ ئەگەرە، بەلێ هندەك فاكتەر هەنە كو فشارا خوینێ بلند دكەن، ژوانژی، قەلەویا زكی، خوارنا زێدە ب خوێ و ب دوهن و چەوری دگەل جگارەكێشانێ و دانعەمربوون و هەروەسا قنێتی ژی كارتێكرنەكا زێدە هەیە و ل دۆر نیشانێن بلندبوونا فشارا خوینێ دیاركر كو 90% یێن تووشی فشاڕا خوینێ دبن چ نیشان ل دەف پەیدانابن و كەسەكێ نورمالە، بەلێ دەمێ ئەم فشارا وی یا خوینێ دگرین دێ بینین یا بلندبووی و كێم نەخۆش هەستپێ دكەن كو سەرێ وان دئێشیت ب تایبەت رەخێ پاتكا وی و هندەك جارا رەنگە هەست ب گێژبوونێ و بێهێزیێ دكەن، بەلێ ئەڤە یا كێمە.
و گۆت: ژبەركو نەخۆشی چ نیشان نینن و كەسەكێ نورمالە و دێ هێت دێ فشارا وی گرین گەلەك یا بلندبووی و ل سەر گۆلچیسكێن وی و چاڤی و سینگی و دلی یا شوولكری و رەنگە ژئەگەرێ وان سەرباركا نەخۆش ژیانا خوە ژ دەست بدەت، لەورا دبێژنێ « بكوژێ بێدەنگ».
د.مجید دیاركر، پتریا نەخۆشێن فشارا خوینێ هەی دشێن رۆژیان بگرن و رۆژی هاریكارە فشارا وان یا خوینێ پتر بهێتە كونترولكرن، چونكو ئەم دبێژینە نەخۆشی پارێزێ بكە و رۆژیگرتن پ خوەژی پارێزە ژ خوێ و دوهنی و گۆت: رەنگە كێم نەخۆش هەبن نەشێن بگرن، بو نموونە هەكە نەخۆشەك هەبیت و دەمێ حەبكا وی ب سەرڤەبجیت فشارا وی گەلەك بلندببیت، دڤێت بخۆت، یان هەكە سەربارك بۆ چێببن بو نموونە، هەكە كارتێكرن ل گۆلچیسكا وی كربیت، یان لاوازبوونا دللی ل دەڤ پەیداكربیت، یانژی دەرمانێن وی گەلەك بن و هەر چەند سعەتەكا بخۆت داكو كارتێكرن لێ نەبیت، ئەڤەژی هەر نەخۆشەك جودایە ژ ئێكێ دی و نۆشدار دێ بڕیارێ ل سەردەت.
دیاركر ژی، هەكە نەخۆشەكی دیت سەرئێشانەكا زێدە ل دەف پەیدابوو، یان دیتنا وی تێكچوو، یان گێژبوون و بێهنتەنگبوون و دلقوتانەكا زێدە ل دەف پەیدابوون باشترە سەرەدانا نۆشداری بكەت.
ل دۆر وەرگرتنا چارەسەریێ ل رەمەزانێ، د.مجید دیاركر، دەرمان دگەل پاشیڤێ و فتارێ پێدڤیە بهێنەخوارن، بەلێ هەكە دەرمانێن ئینانا دەستئاڤێ وەردگریت، باشترە دگەل فتارێ بن، چونكو پشتی هینگی دێ شێت ئاڤێ ڤەخۆت، بەلێ هەكە دگەل پاشیڤێ خوارن و گەلەك دەستئاڤا وی هات، نەشێت ئاڤێ ڤەخۆت و دێ تووشی هشكبوونێ بیت.
