99٪ کۆنترۆلا مادەیێن هۆشبەر دناڤ چاکسازییان دا هاتیە کرن
دلۆڤان ئاکرەیی:
رێڤەبەرێ گشتی یێ چاکسازیان ل هەرێما کوردستانێ دیارکر، شەش چاکسازی ل هەرێما کوردستانێ هەنە و کار دهێتە کرن ل دهۆکێ بۆ ئاڤاکرنا چاکسازیەکێ بۆ ژن و زارۆکان و گۆت: چاکسازیەکا نوو دێ ل گەرمیان هێتە نوژەنکرن و د نوکە دا دناڤ چاکسازیێین هەرێمێ زێدەتر ژ٥٠٠ زیندانیان سزایێ سێدارەدانێ لسەرە.
ئێحسان عەبدولرەحمان، رێڤەبەرێ گشتی یێ چاکسازیان ل هەرێما کوردستانێ بۆ رۆژنامەیا ئەڤرۆ دیار کر، ب گشتی ل هەرێما کوردستانێ نها ٦ چاکسازی هەنە و چاکسازیەکا نوو ل گەرمیان د قوناغا نوژەنکرنێ دایە، چونکو ئاڤاهی هەیە و بتنێ نویژەنکرنا چاکسازیێ دهێتە کرن و گۆت: ل هەولێرێ داخواز هاتیە کرن چاکسازیەکا تایبەت بۆ کەیسێن تیرۆرێ و حوکمێ سێدارەدانێ بهێتە ئاڤاکرن و بریار هاتیە دان چاکسازیا زرکا ل دهۆکێ ب چ ئاوایان نەهێتە ڤەگوهاستن و د جهێ خۆ یێ نوکە دا بمینیت و بتنێ داخواز هاتیە کرن ئاڤاهیەکێ مەزن و شایستە بۆ چاکسازیا ژن و زارۆکان ل دهۆکێ بهێتە چێکرن.
سەبارەت جۆرێن سزایان ئێحسان عەبدولرەحمان ئاشکرا کر، ل ئیراقێ سزایێ سێدارەدانێ و زیندانا هەتا هەتایێ هەنە و گۆت: سزایێ حوکمێ هەتا هەتایێ تا کو٢٠ سالانە و سزایێ سێدارەدانێ بتنێ ئەگەر لایەنێ بەرامبەر کەسوکارێن قوربانی لێبۆرین و پێکهاتنێ بکەن، دادگەه سزایێ وان کێم دکەت بۆ زیندانا هەتا هەتایێ و ب وی رەنگی لێبۆرینا گشتی ڤەدگریت.
رێڤەبەرێ گشتی یێ چاکسازیان نمونەیەک دیار کر و گۆت: ( نها مە ل هەولێر کەیسەکێ ٣٤ سالان زیندان هەیە کو کەسەک ژ ساڵا ١٩٩٢ـێ وەرە واتە ٣٤ ساڵە ل هەولێرێ د زیندانێ دایە ب سزایێ سێدارەدانێ، ژبەرکو کەسوکارێن پلە ئێک یێن خۆ کوشتینە و پێکهاتن نەهاتیە کرن، یاسایا سزادانا ئیراقێ رێ نادەت بهێتە بەردان.
لدۆر ئامار و ژمارەیێن زیندانیان و هەبوونا مادەیێن بێهۆشکەر ئێحسان خویا کر، سەرجەمێ سزادایان د ناڤ چاکسازیێن هەرێمێ دا د نوکە دا ٦,٤٠٠ زیندانی هەنە کو ژ وان کەسان، ٥٤٤ کەسان حوکمێ سێدارەدانێ لسەر هەیە
رێڤەبەرێ گشتی یێ چاکسازیان د بەردەوامیا ئاخفتنێن خۆدا گۆت: ئەم رێگریێ ل ماددەیێن هوشبەر دناڤ چاکسازییان دا دکەین و رێگریەکا توند هاتیە کرن ب هەڤکاری دگەل ئاسایشێ و بکارئینانا ئامیرێن پێشکەفتی یێن سۆنەرێ ل دەرگەهان بۆ پشکنینێ و بکارئینانا سەیێن پۆلیسی یێن تایبەت (K9) بۆ پشکنینا هۆل و ژوران.
ئێحسان عەبدولرەحمان گۆتژى: دنوکە دا ئەم شیاینە د ناڤخۆیا چاکسازییان دا ٩٩٪ کۆنترۆلا مادی هوشبەر بکەین و بنبڕبکەین، هەرچەندە د جڤاکی دا زێدە بوویە و سەدەما سەرەکی یا دزی، کوشتن، و تێکچوونا مالباتانە، لەورا پێدڤیە حکومەتێ پلانەکا هوشیارکرنێ هەبیت.
سەبارەت ب هەبوونا سەنتەرێن چارەسەری و شیاندنەڤەیا ئاڵودەبوویان ئێحسان ئاشکرا کر، د هەر شەش چاکسازییان دا، سەنتەرێ شیاندنەڤەیا ئاڵودەبوویێن ماددێن هوشبەر ل سالێن ٢٠٢٤ و ٢٠٢٥ هاتینە ڤەکرن و ژ سالا ٢٠٢٤ هەتا نوکە ١,١٣٥ کەس هاتینە وەرگرتن و چارەسەرکرن، و زڤڕینە سەر ژیانا خۆ یا ئاسایی.
