99%ێ جیلێ زێڕین خیانەتا هەڤژینیێ دكەن
ئەڤرۆ
هەولێر، قائید میرۆ:
شیرەتكارەكێ خیزانێ هندەك نهێنیێن خێزانێن بەرێ و جیلێ زێڕین ئاشكرا كرن و دیار كر كو، زۆربەیا هەڤژینێن جیلێ زێڕین خیانەتا هەڤژینیێ دكەن و خوە ل هەمبەر ئەڤێ پێلا سۆشیال میدیایێ و ئامیرێن گەهاندنێ ناگرن و گۆت: ژیانا خێزانێن هەژار زۆر بەختەوەرتر و خۆشترە ژ ژیانا خێزانێن زەنگین و خویندەوار .
ئازاد جەلال، شیرەتكارێ خێزانی بۆ رۆژناما ئەڤرۆ دیار كر كو د جڤاكی دا دو جورێن خێزانێ هەنە یێن نوكە دهێنە پێكئینان و خێزانێن بەرێ كو دبێژنێ جیلێ زێڕین، ئەڤێن دبێژنێ جیلێ زێڕین نوكە تەمەنی وان 40 سال و بەر ب سەریە، ئاریشا خێزانێن بەرێ ئەوە گرێیەكا دەروونی هەیە و ل سەردەمێ وان تەكنەلۆژیا پێشكەفتی نەبوویە و ئامیرێن گەهاندنێ و تۆڕێن جڤاكی چەند سالەكە پەیدا بووینە و گۆت: (ئەڤجا دەمێ مرۆڤ د ژیەكێ مەزن دا فێری وان تشتا دبیت یا ب زەحمەتە، ژبەركو ئەو جیهانا ڤەكریا نوكە هەی بەرێ نەبوو، جیلێ زێڕین درەنگ هاتنە دناڤا بابەتێن سۆشیال میدیایێ ئەڤەژی بویە ئەگەر ئاریشە پەیدا ببن)
ئازاد نمونەك ئینا و گۆت: (هەكە ئەم بەراوردیێ بكەین دناڤبەرا هەڤژینێن نها و بەرێ، زۆربەیا ژنێن جڤاكێ كوردی ب پشكا خوە د رازی نینن و ب زەلامێ خوە د رازی نینن، بتایبەتی دەمێ بەرێ خوە ددەنە خێزانێن نها، بەلێ ئەو خێزانا مرۆڤ بەرێ خوە ددەتێ و خوزیا بۆ دخوازیت وەسا نینە و دلێ خێزانا دی یێ خوەش نینە وەكی مروڤ دبینیت).
شیرەتكارێ خێزانی ئەو چەندە نە ڤەشارت و گۆت: (خالەكا دی خیانەتا هەڤژینیە و 99%ێ یا جیلێ زێڕین خیانەتێ ل هەڤژینێن خوە دكەن، ژبەركو جیلێ زێرین ل سەردەمێ خوە نەشیاینە پەیوەندیێ ل گەل رەگەزێ بەرامبەر بكەن و ئامیر نەبووینە پەیوەندیێ ب ژنان بكەن،لێ نها هاتیە بەر دەستێ مە و ئەم نەشێین خوە راگرین هەتا وی رادەی هەموو تەخ و چین مژوولی خیانەت كرنێ نە).
ئازاد جەلال د بەردەوامیا ئاخفتنێن خوەدا گۆت: (روتینێن زۆر د ژیانا رۆژانە یا جڤاكێ كوردی دا هەنە، خوزیكێن خێزانێن نە خویندەوار، ژبەركو مە تەخەك هەیە دبێژنێ تەخا خویندەوار و ل ئاستێن بلندێن زانستی نە و خودان باوەرنامێن بلندن، لێ گەلەك بلند دفڕن، ئانكو رۆتینێن رۆژانە ئەو دەلیڤە بۆ كەسێن خویندەوار و رەوشەنبیر نەهێلایە ب واقعی ل گەل هەڤژینێن خوە بژین ئەڤێ چەندێ پەیوەندیێن جڤاكی و ڤیان كێم كریە دناڤبەرا هەڤژینان و ژلایێ روحیڤە خێزانێن بەرێ جودا بووینە و ب شەڤ ژن یا ل ژۆرەكێ و زەلام ژۆرەكا دی زۆربەیا ژنان پشتی ژیێ راوەستیانا دەورا هەیڤانە خیانەتا هەڤژینیێ دكەن).
شیرەتكارێ خێزانی ئازاد جەلال گۆت: (من ئامار هەنە و من پرسیار كریە ژ ژنان بۆچی خیانەتێ دكەن ل هەڤژینێن خوە بو من دیاربوویە د وەختێ خوەدا هەڤژینێ وان خیانەت كریە و ئەوژی وەك تولڤەكرنێ خیانەتێ ل هەڤژنێن خوە دكەن، ب دیتنا من ژیانا خێزانێن هەژار زۆر خۆشترە ژ ژیانا خێزانێن زەنگین و خویندەوار و خودان باوەرنامێن بلند، ژبەركو مرۆڤێن خویندەوار و زەنگین چو سنور نینە بۆ داخوازیێن خوە بەرۆڤاژی خێزانێن هەژار ژیانەكا زۆر خۆشتر دەرباز دكەن).
