هێزه‌كا ئيرانى هاته دناڤ باژێره‌كێ هه‌رێما كوردستانێ دا
ئەڤرۆنيوز،عەزیز هەورامی:
پشتى نيڤرۆيا ئه‌ڤرۆ دوشه‌مبى 11/12/2017، دو ترومبێلێن له‌شكرى وچه‌ند سه‌ربازێن ئيرانى ل ناڤ بازارى ل باژێرێ قه‌لادزێ يێ ب سه‌ر ئيدارا راپه‌رين ڤه، هاتن ديتن كو زێره‌ڤانێن سنورى يێن هه‌رێمێ دگه‌لدا بوون.
هه‌بوونا سه‌ربازێن ئيرانى ل ناڤ بازارێ باژيرێ قه‌لادزێ، ل ده‌ف وه‌لاتيان تشته‌كێ سه‌ير بوو، له‌وما وێنه وڤيديۆ بو هاتنه گرتن، به‌لێ هيزێن ئه‌منى ل قه‌لادزێ ده‌ست ب سه‌ر كاميره وموبايلێن وه‌لاتيان دا گرتن ئه‌وێن وێنه وڤيديۆ بو وان سه‌ربازێن ئيرانێ دگرتن وهێزێن ئه‌منى ئه‌و وێنه وڤيديۆ ژوان كاميره ومۆبايلان ژێ برن.
لايه‌نێن ئيدارى يێن قه‌لادزێ ئاماده نه‌بوون چو داخۆيانيان بده‌ن ل سه‌ر هه‌بوونا وێ هێزا ئيرانى، ئايا ئه‌گه‌ر چيه سه‌رباز وترومبێلێن له‌شكرى يێن ئيرانى هاتينه ناڤ قه‌لادزێ.
پشتى خيانه‌تا 16 ئوكته‌به‌رێ ژلايێ باله‌كێ ئێكه‌تيێ ڤه، كو ل كوردستانێ كرى، ده‌ستێ هێزێن ئيرانى ب رۆهنى ل ده‌ڤه‌رێن سنورێ ئيدارا ئێكه‌تيێ ده‌ردكه‌ڤيت.
