حوكمه‌تا عيراقێ ئه‌گه‌رێ ناڤ نه‌ئينانا پێشمه‌رگه‌ى ئاشكرا دكه‌ت
ئه‌ڤرۆنيوز:
حوكمه‌تا عيراقى ئه‌گه‌رێ ناڤ نه‌ئينانا هێزێن پێشمه‌رگه‌ى د گۆتارا عه‌بادى دا يا سه‌ركه‌فتنا دووماهيێ ل سه‌ر داعشێ، ئه‌وا ژلايێ سه‌رۆك وه‌زيران حه‌يده‌ر عه‌بادى ڤه هاتيه خواندن، دزڤرينيت بۆ شاشيه‌كا چاپێ.
سه‌عد حه‌ديسى، په‌يڤدارێ نڤيسينگه‌ها راگه‌هاندنێ يا سه‌رۆكاتيا وه‌زيران دديداره‌كێ دا ل گه‌ل كه‌نالێ (الحره) يێ ئه‌مريكى گۆت” ئه‌وا رووداى نه مه‌ره‌مه‌ك بوو ويا ئه‌نقه‌ست نه‌بوو”.
حه‌ديسى گۆت ژى” تنێ ژئه‌گه‌رێ شاشيه‌كا چاپێ بوو د چاپكرنا په‌يڤێن گۆتارێ دا”
دياركر ژى”به‌لگه ژى ل سه‌ر ڤێ چه‌ندێ ئه‌و راستڤه‌كرنا پشتى هينگێ ل سه‌ر وێ گوتارێ ب زمانێن عه‌ره‌بى وكوردى وئينگليزى هاتيه كرن”.
په‌يڤدارێ نڤيسينگه‌ها راگه‌هاندنێ يا سه‌رۆكاتيا وه‌زيران دياركر ژى” به‌رى عه‌بادى به‌ر ب فه‌ره‌نسا بچيت به‌حسێ رۆلێ پێشمه‌رگه‌ى كر دبه‌رهنگاريا تيرۆرێ دا وه‌كو هێزه‌ك دناڤ سيسته‌مێ به‌رگريا عيراقێ دا.
حه‌يده‌ر عه‌بادى، سه‌رۆك وه‌زيرێن عيراقێ دگۆتاره‌كێ دا ل رۆژا شه‌مبيا بۆرى 10/12/2017، سه‌ركه‌فتنا دووماهيێ ل سه‌ر داعشێ راگه‌هاندبوو وده‌ستخوه‌شى ل هێزێن عيراقى يێن جودا جودا كربوو زيده‌بارى حه‌شدا شه‌عبى، بێ كو ناڤێ پێشمه‌رگه‌ى بينيت، ئه‌و چه‌نده ژى بۆ ئه‌گه‌ر كو په‌رله‌مانێ كوردستانێ و وه‌زاره‌تا پێشمه‌رگه‌ى به‌ياننامێن نه‌رازيبوونێ ده‌ربكه‌ن وتێدا ره‌خنه ل عه‌بادى گرت بۆ ناڤ نه‌ئيناناهێزێن پێشمه‌رگه‌ى، ژبه‌ر كو وان رۆله‌كێ مه‌زن د شه‌رێ دژى داعشێ دا هه‌بوو وپتر ژ 1800 شه‌هيد وب هزاران بريندار داينه ومووسل بێ هاريكاريا پێشمه‌رگه‌ى ئازاد نه‌دبوو.
پشتى كارڤه‌دانێن كوردستانى يێن توند ل سه‌ر گوتارا عه‌بادى ،نڤيسينگه‌ها سه‌رۆك وه‌زيرێن عيراقێ راستڤه‌كرنه‌ك دگۆتارێ دا كر، به‌لێ ل ده‌مێ راستڤه‌كرنێ، چو ئاماژه ب هه‌بوونا شاشيه‌كا چاپێ نه‌كربوو.
