ئیرانێ 600 کەس ل سێدارە داینە کو پرانیا وان کوردن
ئەڤرۆ:
رێکخراوا مافێ مرۆڤی یا رۆژھەلاتێ کوردستانێ راپۆرتا خوە یا سالانە ل دۆر بنپێ کرنا مافێ مرۆڤی ل ئیرانێ بەلاڤ کر کو د راپۆرتێ دا ھاتیە دیار کرن ئەڤسالە ھەتا نھا نێزیکی 600 کەسان ل ئیرانێ ھاتینە سێدارەدان کو پرانیا وان ژی کوردن و دەزگەھێن ئێمناھیێ ناھێلن راپۆرتن راست و دروست ل دۆر ئامارا گرتی و سێدارەدانان ل ئیرانێ بەلاڤ بیت.
د بەردەوامیا راپۆرتێ دا ئەو یەک ژی ھاتیە دیار کرن کو پرانیا کەسێن ھاتینە سێدارەدان ب تاوانا دژبەریا دەولەتێ یان ژی مادێن بێھوشکەر بوویە کو پرانیا کوردێن ھاتینە سێدارەدان ب تاوانا دژبەریا سیستەمێ ئیرانێ بوویە، لێ ژ بەر ئاستەنگیێن ھێزێن ئێمناھیێ ھەتا نھا ئامارەکا راست و دروست نینە، لێ ل گۆر ئامارا وان 600 کەسان ژی دەردکەڤیت کو پرانیا وان کوردن. ل ئالیێ دی گەلەک گرتیێن کورد سزایێ سێدارەدانێ ل سەر وان ھاتیە سەپاندن لێ ھەتا نھا نەھاتیە بجە ئینان.
چاڤدێرێن سیاسی دیار دکەن کو ھەتا نھا ژی ترسەکا مەزن ل دەف دەستھەلاتا ئیرانێ یا ھەی کو دێ کورد داخوازا جودابوونێ ژ ئیرانێ کەن و ژ بەر ھندێ ژی رۆژانە نڤیسەر و رۆژنامەڤانێن کورد ل ئیرانێ دھێتە گرتن و یێن داخوازا مافێ کوردان بکەن ژی ب بەھانا تێکدانا رەوشا ناڤخوەیی یا ئیرانێ تووشی سزایێن گران دبن.
