UNHCR هژمارا په‌نابه‌رێن ل هه‌رێمێ ئاشكه‌را دكه‌ت
ئه‌ڤرۆ نيوز:
رێكخراوا UNHCR يا سه‌ر ب نه‌ته‌وێن ئێكگرتى ڤه، هژمارا په‌نابه‌رێن ل هه‌رێما كوردستانێ هه‌ين ئاشكه‌را دكه‌ت.
هه‌تا نوكه زێده‌تر ژ 19 هزار كوردێن رۆژئاڤايێ كوردستانێ ژ كۆبانێ هاتينه هه‌رێما كوردستانێ.
كۆمسيۆنا په‌نابه‌ران يا سه‌ر ب نه‌ته‌وێن ئێكگرتى ڤه UNHCR راپۆرتا نيڤ هه‌يڤانه يا خوه ده‌رباره‌ى په‌نابه‌رێن رۆژئاڤايێ كوردستانێ و عيراقێ ل هه‌رێما كوردستانێ به‌لاڤكرن كو ب گۆره‌يى داتايان، هژمارا په‌نابه‌رێن ژ ده‌سپێكا روودانێن كۆبانێ ژ رۆژئاڤايێ كوردستانێ هاتينه هه‌رێما كوردستانێ گه‌هشتينه 19 هزار و 99 كه‌سان.
ب گۆره‌يى راپۆرتێ ب تنێ ل ده‌سپێكا ڤێ هه‌يڤێ هه‌تا 15ى ڤێ هه‌يڤێ چار هزار و 547 كورد ژ رۆژئاڤايێ كوردستانێ ژ سنورێ ئيبراهيم خه‌ليل هاتينه ناڤ هه‌رێما كوردستانێ و پتريا وان ژى ئه‌ون يێن ژ باژێرێ كۆبانێ هاتينه.
ديسا رێكخراو هوشداريێ دده‌ت كو ل وه‌رزێ زڤستانێ كه‌لوپه‌لێن پێدڤى نينن بۆ هاريكاريكرنا ئاواران، ئه‌ڤێ چه‌ندێ ژى كارتێكرنا خوه يا خراب ل سه‌ر ره‌وشا ژيانا وان دبيت و ب گۆره‌يى داتايێن رێكخراوێ ژى نێزيكى مليۆنه‌ك و 900 هزار ئاواره ژ ده‌ڤه‌رێن دى يێن جودا هاتينه عيراقێ كو ل كوردستانێ دژين و زێده‌تر ژ 200 هزار ئاوارێن رۆژئاڤايێ كوردستانێ و سوريا ژى هاتينه هه‌رێما كوردستانێ.