نوكه ژى هنده‌ك دوشاڤێ ب ڤى ئاميرێ كورده‌وارى چێدكه‌ن
ئەڤرۆ نيوز، نەوزاد ھلۆری:
ھوسل ئێکە ژ ئامیرێن دەستکرد کو جۆتیار و رەزڤانێن کوردستانێ ب گشتی و دەڤەرا بارزان ب تایبەتی بۆ چێکرنا دوشاڤێ بکاردئینن ، و ھەتا نوکە ژی ئەڤ ئالاڤە ل دەڤەرا بارزان دھێتە بکارئینان.
سالح گیزی، ئێکە ژ وەلاتیێن گوندێ گیزێ یێ سەر ب ناحیا شێروان ل دەڤەرا بارزان بۆ ئەڤرۆ گۆت: د بەرێ دا ل دەڤەرا بارزان جۆتیار و رەزڤانان ئامیرەکێ دەستکرد ژ بەری چێ دکر کو د گۆتنێ ھوسل یان ژی ئوسل و دوشاڤا تری تێدا چێ دکر، کو پێک دھات ژ چار بەرا مەتر و نیڤان درێژ و مەترەکێ ژی فرەە و نیڤ مەترێ بلند وەکی حەوزەکا ئاڤێ لێ دکر و تری دکرە تێدا و ب پیاڤە دچوونە سەر و تری دھاتە گڤاشتن و ئاڤا وی ل ئەوی بەری دچوو خوارێ و دبوو دوشاڤ.
زێدەتر گۆت: ئەڤ سالە ژی رەزڤانێن تری ل دەڤەرا بارزان تریێ خوە ب رێیا ھوسلێ کریە دوشاڤ و ھندەک مالان ھەتا 600 سندقان کرینە دوشاڤ، ژبەرکو بازارێ تری ئەرزان بوویە و چو بھایی َخوە نەبوویە، بەلێ ھەکە بکەنە دوشاڤ پتر پارە پێڤە دھێت. ژ بەرکو نوکە کیلۆیا دوشاڤێ ب ھەشت ھزار دیناران دھێتە فرۆتن.
ناڤبری دیارکر ژی کو زورترین رێژەیا دوشاڤا تری ب رێیا ھوسلێ ل گوندێ بێدیال و گیزێ ل سنۆرێ ناحیا شێروان ل دەڤەرا بارزان دھێتە چێکرن، و گۆت ژی: ھوسل رێیەکا سرۆشتی و گرنگە بۆ چێکرنا دوشاڤێ و تاما خوە ناگوھۆریت.
