وه‌لاتيه‌كى سيسته‌مێ گه‌رمكرنا مال ب سۆپا داران دروست كريه
ئەڤرۆ نیوز، نەوزاد ھلۆری:
وەلاتیەکێ کومەلگەھا سیریێ یا سەر ب ناحیا شێلادزێ د نووترین داھێنان دا ل سەر سۆپا داران، شیا سەرکەفتنێ بینیت و خانوویەکێ دو قات ل گەل ژۆرێن نڤستنێ ب ئێک سۆپە گەرم دکەت.
کازم شاجی، کوڕێ ئەوی کەسێ ئەو داھێنان ل سەر سوپا داران کری يه، بۆ ئەڤرۆ نیوز گۆت: “دەستپێکێ مە باوەری نەبوو کو بابێ من بشێت سەرکەفتنێ داھێنانا خوە بکەت ئەو ژی ب ئێک سۆپا داران زێدەتر ژ سێ جھان گەرم بکەت، بەلێ کێمبوونا کارەبا گشتی و به‌لاڤنه‌كرنا گازێ بوویە ئەگەر کو ئەو زێدەتر ل سەر داھێنانا خوە راوەستیت و د ئەنجام دا سەرکەفتنێ بینیت”.
زێدەتر گۆت: “ئەڤ داھێنانە ژ دو سۆپان و بەرمیلەک و فلتەرەکى پێك دهێت ب ره‌نگه‌كى کو سۆپەک ل قاتێ خوارێ یە و ئێک ژی ل قاتێ سەری، ئەم ب تنێ ل جھەکى داران دکەینە سۆپێ، واتە ئەم دارا دکەینە سۆپا قاتێ خوارێ، ئەو گەرماتی و دوکێلا کو ژ سۆپا خوارێ دچیتە سۆپا قاتێ دویێ، سۆپا قاتێ دوۆیێ مە کریە د بەرمیلەکێ دا و دەرگەھێ وێ ھێلایە ڤەکری”.
دا زانين ژى كو د ناڤبەرا سۆپا قاتێ سەری و ئەوێ بەرمیلێ دا 10سم بوشایی ھەیە و ھندەک کون د رەخ و رووێن بەرمیلێ ھەنە دا کو ھەوایی بکێشت، “پاشان ب رێیا ساحیبەیان هەوایێ گەرم ژ وێ بوشایا د بەرمیلێ دا ھەيی دھێتە وەرگرتن و بۆ ژوورێن نڤستنێ دھێتە کێشان، بەلێ ئەڤ یەک پێدڤی ب کارەبه‌كا گه‌له‌ك كێم هه‌يه”.
