دێ ئه‌لبۆما خوه یا ئێكێ به‌لاڤ كه‌ت
ئه‌ڤرۆ نیۆز،زنار تۆڤى:
خانما سترانبێژ رۆژدا بیته‌ر د هه‌ڤپه‌یڤینه‌كێدا بۆ ئه‌ڤرۆ نیۆز دیاركر:كو ئه‌و ب خوه خه‌لكا باژێرێ مۆشێ یه و لێ ئه‌ڤه ماوێ 6 سالانه ئه‌و ل باژێرێ بوردۆ ل وه‌لاتێ فرنسا دژیت،دیسا د ژیێ 4 سالیێ دا وێ ده‌ست ب سترانگوتنێ كریه و نوكه ئه‌و د ژیێ 20 سالیێ دایه و ستران گوتن بوویه پارچه‌كا گرنگ ژ یانا وێ یا رۆژانه،هه‌روه‌سا ئه‌و دناڤ مالباته‌كا هونه‌رى دا مه‌زن بوویه كو باپیرێ وێ حسه‌ینو سترانبێژبوویه و دیسا بابێ وێ و مامێ وێ ده‌لیل دیلانار ژى سترانبێژن،له‌وما مالباتا وێ و ب تایبه‌تى بابێ وێ بۆ وێ هاریكار و پشته‌ڤان بووینه كو رۆژدا ببیته سترانبێژ.
رۆژدا هێشتا دبێژیت:هه‌تاكو نوكه من چو ئه‌لبۆم چێنه‌كرینه،لێ من پشكدارى د به‌رنامه‌كێ هونه‌رى دا كریه ل توركیا كو بۆ ماوێ ساله‌كێ وى به‌رنامه‌ى ڤه‌كێشا،هه‌روه‌سا من ل به‌ره د ئه‌ڤ ساله‌دا ئه‌ز ئێكه‌م ئه‌لبۆما خوه چێكه‌م،كو ژ 10 تراكان پێك دهێت و نوكه ئه‌ز كار د وێ ئه‌لبۆمێ دا دكه‌م،له‌ورا ژبه‌ر نه‌بوونا هاریكاریێ هه‌تاكو نوكه من چو ئه‌لبۆم چێنه‌كربوون،دیسا ژیێ من ژى تا راده‌یه‌كێ یێ بچووك بوو.
رۆژدایێ گوت ژى:خانما سترانبێژ دیلانار یلدز گه‌له‌ك هاریكارى و پشته‌ڤانى ل من كریه كو ئه‌ز سترانا بێژم و هه‌روه‌سا نوكه ئاستێ سترانبێژێن كچ گه‌له‌ك باش بووینه و شیاینه خزمه‌ته‌كا باش پێشكێشى هونه‌رێ كوردى بكه‌ن،دیسا ئه‌ز حه‌ز ژ ده‌نگێ عه‌یشا شانێ و شه‌هریبانا كوردى و دیلانارێ دكه‌م،هیڤى و داخوازیا من ئه‌وه كو ئه‌ز سترانه‌كا دوقولى ل گه‌ل خانما سترانبێژ شه‌هریبانا كوردى بێژم،هه‌ر چه‌نده هه‌تاكو نوكه من ئه‌و ل سه‌ر ڤى بابه‌تى هایدار نه‌كریه.
ده‌رباره‌ى بابه‌تێ شووكرنێ ناڤهاتیێ گوت:مه‌رجێ من ئه‌وه كو ئه‌و كه‌سێ ئه‌ز شوو پێ بكه‌م سترانبێژ بیت،چونكى هه‌كه ئه‌و كه‌س سترانبێژ نه‌بیت،به‌لكى نه‌هێلیت ئه‌ز سترانا بێژم و دبیت بۆ من ئاریشا پیه‌یدا بكه‌ت،چونكى ئه‌ز نه‌شێم بێى هونه‌ر و سترانگوتن بژیم،هه‌روه‌سا ئه‌ز ئامیرێ سازێ دژه‌نم و ئه‌ز سترانا ب زمانێ كوردى و عه‌ره‌بى و توركى و ئنگلیزى و فرنسى دبێژم،لێ د ئه‌لبۆمێدا ب تنێ ئه‌ز دێ سترانێن كوردى بێژم و دیسا گه‌له‌ك یا گرنگه كو سترانبێژ ئامیره‌كێ موزیكێ ژى بزانیت،چونكى دێ شێت ب ره‌نگه‌كێ باشتر هونه‌رێ خوه پێشكێش كه‌ت.
رۆژدایێ ئه‌و یه‌ك ژى گوت:ئه‌ز گه‌له‌ك حه‌ز دكه‌م پشكداریێ د درامایێ و فلمێن سینه‌مایى دا بكه‌م،هه‌ر چه‌نده هه‌تاكو نوكه من پشكدارى تێدا نه‌كریه،لێ من هزر د هندێ دا كریه كو ل پاشه‌رۆژێ پشكداریێ د فلمان دا بكه‌م،هه‌روه‌سا ئه‌ز گه‌له‌ك ژ ده‌نگ و هونه‌رێ خوه یا رازیمه،لێ د هونه‌رى دا ده‌نگ گرنگتره ژ جوانیێ،لێ هه‌كه كچا سترانبێژ ده‌نگ و جوانى هه‌ردو هه‌بن،ئه‌و سترانبێژه دێ شێت خوه پێش ئێخیت و دێ خه‌لك ژى حه‌ز ژ هونه‌رێ وێ كه‌ن،دیسا جاره‌كێ من سه‌ره‌دانا باشۆرێ كوردستانێ ژى كریه و من حه‌ز دكر هه‌ر ل كوردستانێ بمینم و گوت ژى:نوكه داخوازیا من یا ژ هه‌موویان مه‌زنتر و سه‌ره‌كیتر ئه‌وه كو ئه‌ز ئه‌لبۆما خوه یا ئێكێ چێكه‌م،ژ پێخه‌مه‌ت بشێ باشتر خزمه‌تا هونه‌رێ كوردى بكه‌م و بشێم ده‌نگێ خوه بگه‌هینمه هه‌موو حه‌ز ژێكه‌رێن ده‌نگێ خوه.
