حه‌ز ناكه‌ت شوو ب سترانبێژان بكه‌ت
ئه‌ڤرۆ نیۆز ، زنار تۆڤى:
خانما سترانبێژ گونۆل دیلان كو خه‌لكا باژێرێ ئامه‌دێ یه ل باكۆرێ كوردستانێ و د هه‌ڤپه‌یڤینه‌كێ دا بۆ ئه‌ڤرۆ نیۆز دیاركر:كو وێ د ژیێ 9 سالیێ دا ده‌ست ب كارێ سترانگوتنێ كریه و هه‌روه‌سا وێ موزیك ژى ژه‌نیه،هه‌روه‌سا د ژیێ سنێله‌یى یێ دا وێ ل په‌یمانگه‌هه‌كا موزیكێ خواندیه،ل سالا 2007 د پێشبركا جوانیێ دا ل ئورۆپا پلا ئێكێ ب ده‌ست خوه‌ڤه ئینایه،د هه‌مان ده‌مدا به‌رده‌وامى دایه كارێ موزیكێ و ئامیرێ سازێ ژه‌نیه،هه‌ر ل ئورۆپا په‌یمانگه‌ها شانۆیێ و سینه‌مایێ خواندیه،هه‌روه‌سا وێ حه‌ز دكر كو كارێ نمایشكرنا جلكان بكه‌ت،لێ مالباتا وێ بوونه رێگر و نه‌هێلا ئه‌و وى كارى بكه‌ت.
ناڤهاتیێ گوت ژى:ل سالا 2009 بۆ ئێكه‌مین جار من پشكدارى د فلمه‌كێ سینه‌مایى یێ توركى دا كریه،پاشى د ته‌ره‌ته كوردیدا بۆ ماوێ ساله‌كێ من به‌رنامه‌كێ موزیكێ پێشكێشكریه،دیسا ل سالا 2013 من پشكدارى د درامایه‌كا كوردى دا كریه ب ناڤێ “ژان”،كو 56 زنجیرێن درامایى بوون و بۆ ماوێ دو سالا وێ درامایێ ڤه‌كێشا،پشتى هنگێ من پشكدارى د فلمه‌كێ سینه‌مایى یێ توركى دا كریه ل سته‌نبۆلێ و نوكه ئه‌و فلم دهێته نمایشكرن ل هۆلێن سینه‌مایێ ل توركیا،گونۆل هێشتا دبێژیت:نوكه ئه‌ز كار ل سه‌ر چێكرنا ئه‌لبۆمه‌كێ دكه‌م،كو ژ پێنج تراكان پێك دهێت و هه‌موو ژى ب زمانێ كوردى من گوتینه و د هه‌مان ده‌مدا دێ سترانان ژ وێ ئه‌لبۆمێ كلیپ كه‌م،هه‌روه‌سا ل پرانیا وه‌لاتێن جیهانێ من كونسێرت و ئاهه‌نگ گێراینه،دیسا هه‌تاكو نوكه من سێ كلیپ و دو ئالبۆم هه‌نه،كو ب هه‌ردو زمانێن توركى و كوردى من گوتینه.
خانما گونۆل ئه‌و چه‌ند ژى ئاشكراكر:ئه‌ز گه‌له‌ك حه‌ز دكه‌م سه‌ره‌دانا كوردستانێ بكه‌م،هه‌ر چه‌نده گه‌له‌ك داخوازى ژ من هاتیه كرن،كو ئه‌ز پشكداریێ د درامایێ و فلمێن سینه‌مایێ دا بكه‌م ل كوردستانێ،لێ هه‌تاكو نوكه من بریار نه‌دایه كو ئه‌ز پشكداریێ د وان كاران دا بكه‌م،چونكى ئه‌و كارێن ئه‌ز پشكداریێ تێدا دكه‌م،دخوازم كارێن باش بن و ل گوره‌ى حه‌زا من یا هونه‌رى بن.
هه‌روه‌سا گوت ژى:نوكه گه‌له‌ك كێماسى د سینه‌ما كوردى دا هه‌نه،لێ هێدى هێدى سینه‌ما كوردى یا پێش دكه‌ڤیت،هه‌روه‌سا هه‌تا راده‌یه‌كێ باش كچا كورد یا ئه‌كته‌ر و سترانبێژ ئاسته‌نگ ده‌رباز كرینه و ئێدى هونه‌ر باش برێڤه دچیت،دیسا خه‌لكێ مه ژى رێز و بهایه‌كێ باش دده‌ته هونه‌رمه‌ندێن مه ب تایبه‌تى یێن كچ،ئه‌و چه‌ند ژى گوت:نوكه ئه‌ز كارێ سترانگوتنێ و ئه‌كته‌ریێ پێكڤه دكه‌م و هه‌ردو كار ژى بۆ من دخۆشن،لێ ئه‌ز پتر حه‌ز ژ كارێ سترانگوتنێ دكه‌م،هه‌روه‌سا حه‌ز دكه‌ت سترانه‌كا دوقولى ل گه‌ل هونه‌رمه‌ند شڤان په‌روه‌رى یان جوان حاجوى بێژیت،دیسا گونۆل دیلان حه‌ز دكه‌ت شوو ب كه‌سه‌كێ ئاسایى بكه‌ت و حه‌ز ناكه‌ت ئه‌و كه‌سێ ئه‌و شوو پێ بكه‌ت سترانبێژ یان ئه‌كته‌ر بیت،هه‌روه‌سا هه‌كه مه‌رجێ شووكرنا وێ هێلانا هونه‌رى ژى بیت،ئه‌و یا به‌رهه‌ڤه هونه‌رى ب هێلیت.
گونۆل دیلان ل سالا 1991 ل باكۆرێ كوردستانێ و ل باژێرێ ئامه‌دێ ژ دایك بوویه،نوكه ژى ل هه‌مان باژێر دژیت.
