پێنج یانەیێن پارێزگەهێ دێ هەڤڕكیێ بۆ ناسناڤێ ئیراقێ كەن
قەیس وەیس:
چاڤەڕێ دهێتە كرن ئەڤرۆ دەست ب هەڤڕكییێن وەرزێ نوو یا قارەمانییا ئیراقێ بۆ یارییا تیكۆنجتسۆ والسكی ل سەر ئاستێن تازەپێگەهشتی، لاوان و پێشكەڤتیان بۆ كوڕان و كچان ل پارێزگەها دهۆكێ بهێتە كرن.
مەحمود ئیبراهیم سەرۆكێ فدراسیۆنا تایكۆنجتسو یا ئیراقێ دیار كر ئەڤرۆ دێ ب فەرمی دەست ب هەڤڕكیێن وەرزێ نوو یا قارەمانییا تیكۆنجتسۆ ل سەر ئاستێ كوڕان و كچان بۆ تازەپێگەهشتی، لاوان و پێشكەڤتیان ل هۆلا پەیمانگەها ڤیا یا ناحوكمی و بنگەهێ وەرزش و لاوان ل پارێزگەها دهۆكی كو دهێتە هژمارتن ئێك ژ مەزنترین قارەمانی ژبەركو دێ ب پشكدارییەكا ئێكجار زوور یا یاریزانان ژ یانەیێن كوردستانێ و ئیراقێ كو دێ وەكو فەستیڤالەكا وەرزشی بیت.
هەروەسان ناڤهاتی گۆت: پێنەڤێت ژێگرتنا پارێزگەها دهۆكێ ژ بەر هەبوونا خالێن سەركەفتنێ لڤێ باژێری ژ ژێرخانەیا وەرزشی، سەقایێ گونجایی و گرنگتر پشتەڤانییا بەرپرسێن پارێزگەهێ بۆ ڤی قارەمانیێ، قارەمانی دێ بۆ ماوەیێ چار هەتا پێنج رۆژان بەردەوامبیت، سەركەڤتیێن ئێكێ و دویێ یێن هەر كێشا ئاستێن یاریزانان دێ بۆ هەلبژارتیێ ئیراقێ هێنە داخوازكرن پێخەمەت بەرهەڤی بۆ قارەمانییا نێڤدەولەتی ئەوا دێ ل چریا ئێكێ یا بهێت ل بەغدا هێتە كرن.
ژلایێ خوەڤە شیمال محەمەد سەرپەرشتێ یارییا تیكۆنجتسۆیێ و ڕاهێنەرێ پارێزگەهێ بۆ ئەڤرۆ گۆت: قارەمانییا ئەڤ جارە دێ هەڤڕكییەكا بهێز بیت دناڤبەرا یانەیێن پشكدار و پێشبینییا پشكدارییەكا ئێكجار زوور هەبیت، ل پارێزگەهێ 60 یاریزان ژ پێنچ یانەیان دێ پشكداربن و بەلاڤبووینە ل سەر هەر ئێك ژ یانەیا ئافرەتێن دهۆك كو تایبەتە ب كچان ڤە، یانەیا دهۆك كچ و كوڕ، یانەیێن گارە و پیرس ژی كچ و كوڕ ل دووماهیێ یانەیا بەردەڕەش ل سەر ئاستێ كوڕان بتنێ.
ژلایەكێ دووڤە ناڤهاتی گۆت: هەرچەندە هژمارەكا ئێكجار زوور یا یاریزانان دێ پشكداربن، لێ ب دیتنا من و گەشبینم یاریزانێن یانەیێن پارێزگەهێ دێ هەڤڕكییا ڕێزێن پێشیی كەن و دێ هندەك جهێ خوە دناڤ ڕێزێن هەلبژارتیێ ئیراقێ دا بن و ئەڤە ژی ئارمانجا مە یە.
