شەرێ ناڤخوەیی ل لیبیا دژوار دبیت
ئەڤرۆ:
ئاژانسا رویترز د راپۆرتەکێ دا بەحسێ دژواربوونا شەرێ ناڤخوەیی ل لیبیا دکەت و د راپۆرتێ دا ھاتیە کو د تنێ ل مەھا بۆری نێزیکی چارسەد کەسان ل لیبیا ھاتینە کوشتن و ب سەدان کەس ژی بریندار بووینە و ژ بەر شەرێ ب ھزاران وەلاتێن لیبیا ژی مال و جھێن خوە ھێلاینە و بەر ب دەڤەرێن دی کۆچبەر بووینە و ژ بەر ڤێ یەکێ ژی رەوشا ژیانێ ل گەلەک باژارێن لیبیا خرابە و د بیاڤێ ئێمناھی و ئابووریێ دا لیبیا تووشی قەیرانەکا مەزن ھاتیە و فرەنسا ژی بزاڤێن مەزن دکەت کو دەستپێشخەر بیت بۆ چارەکرنا ئالۆزیێن ل لیبیا، لێ ژ بەر شەرێ دژی داعشێ ئەمریکا ھەموو ھێزا خوە ل عیراق و سووریێ بکار دھینیت و ژ بەر ڤێ یەکێ ژی وەک پێدڤی گرنگی ب رەوشا لیبیا ناھێتە دان.
د بەردەوامیا راپۆرتا ئاژانسا رویترز دا ھاتیە کو فرەنسا بەری نھا ژی ھۆشداری دابوو وەلاتێن ئورۆپا و ئەمریکا کو رەنگە لیبیا ببیتە ناڤەندا رێکخراوێن تیرۆرستی و ڤەکۆلینێن ڤێ دووماھیێ ژی نیشا ددەت کو دژواربوونا شەرێ د ناڤبەرا لەشکرێ لیبیا ل گەل گرۆپێن توندرەوێن ئیسلامی وەسا کریە کو گەلەک کەس ژ لیبیا بچنە ناڤ داعشێ و نھا مەترسیا ڤێ یەکێ ھەیە کو داعش بزاڤێ بکەت ل لیبیا ژی خوە ب رێکخستن بکەت و ھەکە بلەز چارەیەک بۆ رەوشا لیبیا نەھێتە دیتن دێ مەترسیا لیبیا ژ یا عیراق و سووریێ ژی مەزنتر بیت.
ل ئالیێ دی رێکخراوا مافێ مرۆڤی ژی د راپۆرتەکێ دا دیار کریە کو پشتی دژواربوونا شەرێ لەشکرێ لیبیا ل گەل گرۆپێن توندرەوێن ئیسلامی ب ھزاران وەلاتی ژ لیبیا رەڤینە و چارەنڤیسێ ب ھزاران وەلاتیێن لیبیا ژی دیار نینە و رەوشا ژیانا خەلکێ ژی رۆژ ب رۆژێ خرابتر دبیت.