42 ساله وه‌لاتيێن گونده‌كێ كوردستانێ داڤه‌رستێ بو هاتنوچۆنێ بكاردئینن
ئه‌ڤرۆ نیوز ، نه‌وزاد هلۆرى:
ژ سالا 1976 هه‌تا نها وه‌لاتیێن گوندێ هلورا یا سه‌ر ب ناحیا شێلادزێ بو ده‌ربازبوون ژ ئاڤا رووبارێ زێ مه‌زن داڤه‌رستێ بكاردئینن ، و پشتى سالا 1992 دوباره جاره‌ك دن داڤه‌رسته‌كا نوو هاته چێكرن و ل وى ده‌مى بو پشكداریكرن د شوره‌ش و راپه‌رین و چونا ده‌واما پێشمه‌رگاتیێ و ڤه‌گوهاستنا بووك و زاڤا دهاته بكارئینان ، و پشتى دوو سالان ژ خرابوونا داڤه‌رستێ ، جاره‌ك دن سه‌ر ژ نوو داڤه‌رسته‌كا دن چێكره‌ڤه.
سه‌دیق عه‌بدوللا دانعه‌مریه‌كێ گوندێ هلورایه دیاركر كو ئه‌ڤه ژ سالا 1976 هه‌تا نها ئه‌و داڤه‌رستێ بكاردئینن و بو ئه‌ڤرۆ نیوز گۆت: ( د وه‌ختێ خودا داڤه‌رست بو پشكداریكرنا د شوره‌ش و راپه‌رین و چوونا ده‌واما پێشمه‌رگاتیێ دهاته بكارئینان ، و خێر و شه‌رێن مه لسه‌ر ئه‌ڤێ داڤه‌رستێ بوون )
جیهاد موسته‌فا ئه‌و ژى وه‌لاتیه‌كێ گوندى یه و پێشتر بو چوونا ده‌واما خویا قوتابخانێ چه‌ند ساله‌كا داڤه‌رست وه‌كو رێیا هاتنوچونێ بكارئینایه بو ئه‌ڤرۆ نیوز گۆت: ( داڤه‌رست رێیه‌كا مه‌ترسى بوویه لسه‌ر چوونا مه‌یا قوتابخانێ ب تایبه‌تى د وه‌رزێ زستانێ و بوهارێ دا ژ به‌ركو ئاڤا رووبارى ب ره‌نگه‌كێ زور بلندبوو و دگه‌هشته ئاستێ داڤه‌رستێ ، نها ژى ئه‌ز وه‌كو وتاربێژێ مزگه‌فتا گوندێ هلورا دیسان بو هاتنوچونێ داڤه‌رستێ بكاردئینم )
ژلایێ خوڤه عه‌بدوللا هلورى موختارێ گوندێ هلورا لسه‌ر چه‌وانیا چێكرنا داڤه‌رست و پێكهاته‌یا وێ و گل و گازندێن خه‌لكێ گوندى ل بارا هاتنوچوونێ و ئه‌ڤرۆ نیوز گۆت: ( داڤه‌رست پێكدهێت ژ تێكه‌لێ و چوار ستوونان كو هه‌ر دوو ژ لایه‌كێ رووبارى ب شێوه‌یه‌كێ موكوم و باش هاتیه چكلاندن ، و پاشان نه‌كه‌ف و سندوق و گولبه‌رینه‌ك ژى ب داڤه‌رستێ ڤه هاتینه گرێدان و هوسا داڤه‌رست دهێته چێكرن ، و جهێ شه‌مبزاریێ یه بو حوكمه‌تێ كو دووباره ئه‌م هه‌وجه‌یێ داڤه‌رستێ كرین و داڤه‌رست رێیا هاتنوچوونا وه‌لاتیان بوو ل سالێن 1970 نه‌ك نها ، و زێده‌بارى كو داڤه‌رستێ مه‌ترسى لسه‌ر ژیانا وه‌لاتیان درۆستكریه و پێشتر چه‌ند كه‌س ژ ئه‌گه‌را چوپه و داڤه‌رست و رووباران گیانى َخوه ژ ده‌ستدایه ، د هه‌مان ده‌م دا دبێژین پێدڤى یه لایه‌نێن شوله‌ژێ و كارگێریا ناحیا شێلادزى َهزرێ د چێكرنا رێیا سه‌ره‌كى یا رێزه گوندێن زێباریان و پره‌كێ بو گوندى َمه بكه‌ت داكو ئێدى ئه‌م ژى بكارین ب ساناهى هاتنوچونێ بكه‌ین )
