سوبەھی فیستەڤالا یۆبیلا زیڤی یا زانکۆیا دھۆک دێ ھێتە گێران
ئەڤرۆ نيوز:
سەرۆکاتیا زانکۆیا دھۆک دێ فیستەڤالا یۆبیلا زیڤی یا زانکۆیا دھۆک ل رۆژێن 24 و 25 و 26/4/2018ێ ل دەمژمێر 10ی سپێدێ ب ئەنجامدانا چەندین چالاکیێن ھەمەجۆر ل ناڤەندا قوتابیان ل زانکۆیا دھۆک گێریت.
دکتۆر مێھڤان عارف، ھاریکارێ سەرۆکێ زانکۆیا دھۆک بۆ کاروبارێن قوتابیان بۆ رۆژناما ئەڤرۆ دیار کر کو ب ھەلکەفتا بۆرینا 25 سالان ل سەر ژیێ زانکۆیا دھۆک دێ فیستەڤالا یۆبیلا زیڤی یا زانکۆیا ناڤھاتی ب ئەنجامدانا چەندین چالاکیێن کۆلیژ و سەنتەرێن زانکۆیێ و چالاکیێن زانستی و کلتووری و دیزاین و نیشادانا بەرھەمێن قوتابیان و کۆنفرانس و ئاھەنگ و شانۆیان ھێتە گێڕان و گۆت: “دخوازم رێژەکا مەزن ژ خەلکێ پارێزگەھا دھۆکێ پشکداریێ د فیستەڤالا یۆبیلا زیڤی یا زانکۆیا دھۆک دا بکەن داکو کار و چالاکیێن زانکۆیێ ژ نێزیک ببینن”.
دکتۆر مێھڤان عارفی گۆت: ” ل رۆژا ئێکێ فیستەڤال دێ ل ناڤەندا قوتابیان ھێتە ڤەکرن و ل ھەمان جە دێ پشکنینا ددانان ل جھێ ڤەکرنا فیستەڤالێ ژ ئالیێ کۆلیژا پزیشکیا ددانان ڤە ھێتە ئەنجامدان، ھەروەسا ڤێراگەھشتنێن دەستپێکی و شیرەت ل دۆر ھندەک نەخۆشیان و ڤەژاندنا دلی و پشکنینێن راستەوخوە دێ ژ لایێ کۆلیژا پەرستاری ڤە ھێنە ئەنجامدان و سەرەرایی ڤێ چەندێ دێ دیزاینێن دەرچوونێ یێن قووتابیێن قووناغێن دووماھیێ یێن ھەموو پشکێن کۆلیژا ئەندازیاری ھێنە نیشادان”.
ناڤھاتی ئاماژە دا وێ چەندێ کو ھەر د رۆژا ئێکێ یا فیستەڤالێ دا کۆلیژا کارگێری و ئابووری دێ فیستەڤالا بازارکرنێ ب ئامادەبوونا پتری 60 کۆمپانیێن بازرگانی و فرۆتنا راستەوخوە یا کەلوپەلان گێریت، ھەروەسا کۆلیژا یاسا دێ دادگەھەکا نموونەی و پێشانگەھەکا وێنێن بیرھاتنان و ئێکا پرتووکان ژی نیشادەت، د ھەمان رۆژ دا کۆلیژا زانستێن مرۆڤایەتی دێ چەندین چالاکیێن کەلتۆری یێن پشکا زمانێ کوردی ئەنجام دەت و زێدەباری ڤێ چەندێ دێ شانۆگەریێن پشکا شانۆیێ و کەڤالێن پشکا شێوەکاری و چەندین چالاکیێن پشکێن مێژوو وجۆگرافی و زانستێن سیاسی و زانستێن ئیسلامی نیشادەت و گۆت: “کۆلیژا زمانان ژی دێ چالاکیێن کەلتووری یێن پشکا زمانێ کوردی و شانۆگەریەکا ب زمانێ ئنگلیزی نیشادەت و ھەمان کۆلیژ دێ دیبەیتەکا ب زمانێ ئنگلیزی دناڤبەرا پشکێن زمانێ ئنگلیزی و وەرگێڕانێ دا ئەنجام دەت، ھەروەسا کۆلیژا تەندروستی ژی دێ پشکنینێن تەندروستی ئەنجام دەت و کۆلیژا پزیشکی ژی دێ پێشانگەھا ئەو کارێن مامۆستا و قوتابیێن پزیشکی ل کۆلیژێ ئەنجام ددەن نیشادەت، د ھەمان رۆژ دا کۆلیژا دەرمانسازی دێ تاقیکرنێن زانستی یێن نوو ل دۆر دەرمانان نیشادەت”.
ھاریکارێ سەرۆکێ زانکۆیا دھۆک بۆ کاروبارێن قوتابیان خویا کر کو د رۆژا دویێ یا فیستەڤالێ دا کۆلیژا زانست دێ پێشانگەھا پرۆژێن دەرچوونێ یێن قوتابیان ڤەکەت، ھەروەسا کۆلیژا پلاندانانا جھەکی و زانستێن کارەکی ژی دێ پێشانگەھا پرۆژێن دەرچوونێ یێن قوتابیان ل دۆر پلاندانانێ و جیۆلۆژی ڤەکەت، د ھەمان رۆژ دا کۆلیژا پەروەردا بنیات دێ چالاکیێن کەلتۆری یێن پشکا زمانێ کوردی نیشادەت و ھەمان کۆلیژ دێ خوارنێن کوردەواری ئامادەکەت و جلکێن نەتەوەیی و چالاکیێن پشکێن دی یێن کۆلیژێ ژی دێ نیشادەت، د ڤێ فیستەڤالێ دا کۆلیژا پەروەردە ل ئاکرێ ژی دێ خوارنێن کوردەواری ئامادەکەت و کارێن دەستی و جلکێن نەتەوەیی و کەلتۆری یێن دەڤەرێ ژی دێ نیشادەت و گۆت: “ھەر د رۆژا دویێ یا فیستەڤالێ دا سەنتەرێ بێشکچی بۆ ڤەکۆلینێن مرۆڤایەتی دێ کۆنفرانسێ خوە و کۆربەندێ زانستی یێ ئێکێ یێ سەنتەرێن ڤەکۆلینێن مرۆڤایەتی ل ھەرێما کوردستانێ و دناڤبەرا کەتوار و حەزان دا گێریت، ھەروەسا کۆلیژا پەروەردا بنیات ل ئامێدیێ ژی دێ خوارنێن کوردەواری ئامادەکەت و چەندین کارێن دەستی و جلکێن نەتەوەیی و دەڤەرێ ژی نیشادەت، د ھەمان رۆژ دا سەنتەرێ رەوشەنبیری دێ پێشانگەھا کەڤالێن پێشمەرگەی و شەھیدان ڤەکەت و دووڤ دا ئەو کارێن ل سەنتەرێ ناڤھاتی ھاتینە ئەنجام دان دێ نیشادەت”.
دکتور مێھڤانی دیار کر کو د بەردەوامیا چالاکیێن رۆژا دویێ یا فیستەڤالێ دا ناڤەندا قوتابیان دێ دیزاینێن دەرچوونێ یێن قووتابیێن قووناغێن دووماھیێ یێن ھەموو پشکێن کۆلیژا ئەندازیاری نیشادەت و کۆلیژا کارگێری و ئابووری ژی دێ فیستەڤالا بازارکرنێ ب ئامادەبوونا پتری 60 کۆمپانیێن بازرگانی و فرۆتنا راستەوخوە یا کەلوپەلان گێریت و گۆت: “د رۆژا سێیێ یا فیستەڤالێ دا سەنتەرێ بێشکچی بۆ ڤەکۆلینێن مرۆڤایەتی دێ کۆربەندێ زانستی یێ ئێکێ یێ سەنتەرێن ڤەکۆلینێن مرۆڤایەتی ل ھەرێما کوردستانێ و دناڤبەرا کەتوار و حەزان دا گێریت، د ھەمان رۆژ دا کۆلیژا چاندنێ دێ جۆرێن داروبارێ دارستانێ و جۆرێن گۆشتی و جۆرێن گۆلا و پۆستەرێن شیرەتکاری ل دۆر چاندنێ نیشادەت”.
ل دووماھیێ ھاریکارێ سەرۆکێ زانکۆیا دھۆک بۆ کاروبارێن قوتابیان ئاشکرا کر کو د رۆژا دووماھیێ یا فیستەڤالێ دا کۆلیژا پزیشکی ڤێتێرنەری دێ شیرەت و چارەسەریا گیانەوەرێن د مالان دا دھێنە ب خودانکرن بەرچاڤ کەت و د ھەمان دەم دا دێ چارەسەریا گیانەوەرێن کەھی ھێتەکرن، ھەروەسا ناڤەندا قوتابیان دێ دیزاینێن دەرچوونێ یێن قووتابیێن قووناغێن دووماھیێ یێن ھەموو پشکێن کۆلیژا ئەندازیاری نیشادەت و کۆلیژا کارگێری و ئابووری ژی دێ فیستەڤالا بازارکرنێ ب ئامادەبوونا پتری 60 کۆمپانیێن بازرگانی و فرۆتنا راستەوخوە یا کەلوپەلان گێریت و گۆت: “فیستەڤالا یۆبیلا زیڤی یا زانکۆیا دھۆک ل 26/4/2018ێ ل دەمژمێر 5:00 ئێڤاری دێ ل ھۆلا کۆنفرانسان ل زانکۆیا ناڤھاتی ب دووماھی ھێت”.
زانکۆیا دھۆک ل سالا 1992ێ ھاتیە دامەزراندن و پشتی چار سالێن خواندنێ ل سالا 1995 – 1996 گەڕا ئێکێ یا قوتابیان ژێ دەرچوویە و ھەتا نوکە 22 گەڕێن قوتابیان ژێ دەرچووینە.
