پالدان!!
محه‌مه‌د چه‌لكى
سپێدێ زوى و بێى له‌خرینى شكاندن، ژ مال ده‌ركه‌فت. هزار و ئێك خوركومانا سه‌رێ وى كربوو ته‌مباڤ. چ هزرا دلێ وى ئارام نه‌دكر، بێى هه‌ست و سه‌مت و ریتم پێنگاڤ دهاڤێتن. قره قر و شه‌ماتێ، شریتا خوركومانێن وى پچاند. ل سه‌متا شه‌ماتێ چوو. خوه ل به‌ر ده‌رێ كومسیۆنا هه‌لبژارتنان دیت. هاته بیرێ هێشتا كارتا هه‌لبژارتنان وه‌رنه‌گرتیه و ده‌ركه‌فتنا وى یا ڤێ سه‌ركێ سحارێ هه‌ر ژبه‌ر كارتێ بوو. ده‌ما نێزیكى ده‌رگه‌هى بووى، دیت خره‌پشێنا چه‌ند كه‌سه‌كانه ل سه‌ر رێزێ و هه‌ر ئێك یێ دبێژته وى خۆرتێ لیستا ناڤ نڤێسنێ دده‌ستاندا، ئه‌ز به‌رى وى یێ هاتیم. مامێ عه‌لۆ نه‌شیا خوه لبه‌ر ڤى دیمه‌نێ كۆمیدى بگرت و بوو لیقه لیقا وى.
– ریه گه‌ڤۆزۆ تۆ بچى دكه‌ى كه‌نى، ما كه‌سه‌كى ت … كریه؟
– من گوه لێ نه‌بوویه؟
– پا جه‌نابێ ته ب چ دكه‌نت؟
– بۆ به‌خت ڕه‌شیا خوه …
– ئێ .. پاده‌ڤێ خوه بگره!
– خوه‌زى مامۆ شیابامه خوه، حه‌فت سال مرۆڤى دڤێن هه‌تا فێرى ئاخفتنێ بت، لێ حه‌فتێ سال دڤێن هه‌تا خوه فێرى نه‌ئاخفتنێ بكه‌ت!
– چیێ دفه‌لسفینت، ده‌ڤێ خوه بگره و ئه‌گه‌ر…
– چ ده‌قێ ڕه‌شى …
– ده‌قێ ڕه‌ش چیه؟
– ئێكێ وه‌كو ته‌یه ..
– ئانكو ئه‌ز ده‌قێ ڕه‌شم، پا دا ده‌قێن ڕه‌ش نیشا ته بده‌م…
– عه‌زیزۆ رێزێ تێك نه‌ده، ئه‌ز باش دزانم كه‌رێ ته ل جهه‌كێ دى یێ هلنگفتى، ئه‌ڤجا هه‌وجه ناكه‌ت، ئه‌ز و تۆ به‌ربینه ئێك.
– ئاخفتنێن بتیفكل نه‌بێژه!
– لا حه‌یله‌ل وه‌ڵا …
هێشتا مامێ عه‌لۆى ئاخفتنا خوه ب دووماهى نه ئیناى، كابراى بهێرس پاڵه‌ك پێڕانا و تبلا خوه لێ ڕاستڤه‌كر و گۆتێ:
– حه‌تا ناڤێ من نه‌هێت نڤێسین تۆ ئیك پێنگاڤ ناچیه پێش؟
– بلا ئه‌ڤرۆ ژى وه‌كو دوهى بت.
– تڕانێن خوه بمن دكه‌ى، ما ئه‌ز لێبۆكێ ته‌مه؟
– ئه‌ستغفیره‌لله … ژ من زێده‌یه ئه‌ز مرۆڤه‌كى بێشینم.
– پا مه‌رامه ته چیه؟
– مامۆ ئه‌ڤه سه‌رێ حه‌فتیه‌كێیه ئه‌ز دهێم دا كارتا خوه وه‌ربگرم، لێ خوه‌شمرۆڤ ناهێلن نێزیكى په‌نجه‌را كومسیۆنێ ببم، ده‌ست ژپیا درێژتر ڤه‌دگه‌رهم. به‌رى خۆرتێ هێرس گرتى به‌رسڤا مامێ عه‌لۆ بده‌ت، پێخته‌كێ هێرشى به‌رده‌رگه‌هى كرن و مامێ عه‌لۆ بكۆته‌كى خوه قۆرتالكر و گۆت: وه‌ح پا ئه‌ڤ ملله‌تى بۆ پالدانا ئێكو دوى زیره‌كه، خوزیا ده‌ریێ میرێ مرادا بۆ پالدانا داگیركه‌رێن كوردستانێ هنده دزیره‌كبان.
2018.05.05
