بالیۆزێ ئەلمانیا ل تورکیا بۆ ئەڤرۆ بەحس ل ھەڤکاریێن وەلاتێ وی بۆ کوردان ل داھاتی دکەت
ئه‌ڤرۆ نيوز:
د دیدارەکێ دا بۆ رۆژناما ئەڤرۆ کو سەرجان مەحمود ل وەلاتێ تورکیا بەرھەڤکریە، بالیۆزێ ئەلمانیا ل وی وەلاتی راگەھاند کو د شەرێ ل دژی تیرۆرستان دا دێ ھەتا داویێ ھاریکاریا کوردان بکەن و گۆت: “شەرڤان و پێشمەرگەیێن کورد ب دلەکی مەزن ڤە بۆ ئازادیا ئاخا خوە شەرێ تیرۆرستێن داعشێ دکەن و ئەز جارەکا دی دبێژم د شەرێ ل دژی تیرۆرێ دا چ ژ دەستێ مە بھێت ئەم دێ کەین و کوردان ب تنێ ناھێلین”.
ئیبرھارد پۆل بالیۆزێ ئەلمانیا ل تورکیا بۆ دیتنا رەوشا پەنابەرێن کۆبانێ یێن ل سروجێ “پیرسوس” ل گەل شاندەکا حوکمەتا ئەلمانیا سەرەدانا کەمپێن پەنابەران کر و پشتی سەرەدانا خوە تایبەت بۆ رۆژناما ئەڤرۆ راگەھاند کو ئەو کەیفخوەشە کو ئەڤرۆ سەرەدانا کوردێن رۆژئاڤا ل سروجێ دکەت و گۆت: “ل ئەلمانیا ب سەد ھزاران وەلاتیێن کورد دژین و بۆ سەرنج راکێشانا سەر رەوشا کۆبانێ و شنگالێ رۆژانە چالاکیان ئەنجام ددەن و ئەم ژی وەک ئەلمانیا نەشێین ل ھەمبەر کریارێن نە مرۆڤی یێن تیرۆرستان بێدەنگ بمینین و ئەڤ سەرەدانا مە ژی بۆ ناسکرنا رەوشا خەلکێ کۆبانێیە و دلنیا بن ئەم دێ د ھەر واری دا ھەڤکاریێن پێدڤی بدەینە گەلێ کورد و پشتەڤانیێ ل وان بکەین”.
بالیۆزێ ئەلمانیا ھەروەسا راگەھاند ژی کو رەخنەیێن گەلەک دژوار ل سەر حوکمەتا تورکیا ھەنە و ھژمارەک مەزن ژ رۆژنامەڤان و پەرلەمانتارێن کوردێن تورکیا و سازیێن سڤیل بۆ مە دیار کرینە کو تورکیا سنۆرێن خوە بۆ دەربازبوونا تیرۆرستێن داعشێ ڤەکری ھێلایە و تیرۆرست ژ ئاخا تورکیا ڤە ھێرشێ کۆبانێ دکەن و گۆت: “ئەز دێ رەخنە و زانیاریێن کو کەڤتنە دەستێ مە ل گەل حوکمەتا تورکیا و حوکمەتا خوە پارڤە بکەم و دڤێت ھەموو ئالیەک بزانیت کو داعش نە ب تنێ بۆ کوردان لێ بۆ ھەموو جیھانێ مەترسیە و ب تایبەت ژی بۆ تورکیا و دڤێت تورکیا د شەرێ ل دژی تیرۆرستێن داعشێ دا ب دلسۆزی و ب ھەر رەنگەکی ل گەل ھەڤپەیمانا نێڤدەولەتی کار بکەت”.
ل سەر ھاریکاریا بۆ پەنابەرێن کۆبانێ یێن کو نھا ل باکورێ کوردستانێ نە ژی بالیۆزێ ئەلمانیا راگەھاند کو نوونەرێن سازیێن خێرخوازی یێن ئەلمانیا ژی ل گەل مە سەرەدانا کەمپێن پەنابەران کرن و ھژمارەک پاکێتێن ھاریکاریێ ل گەل خوە دا ئیناینە و پشتی ناسکرنا رەوشا پەنابەران دێ ئاستێ ھاریکاریێن مرۆڤی زێدە بکەین و تشتێن پێدڤی دێ دابین کەین و گۆت: “ئەم ھەم ژ بەرخوەدانا ل کۆبانێ ژ نێزیک ڤە ئاگاھدارین و ھەم ژی رۆژانە ل گەل حوکمەتا خوە گەنگەشەیێ ل سەر رەوشا خەلکێ کۆبانێ دکەین و ئەز دشێم ب دلنیایی ڤە بێژم کو ئەم خەلکێ کۆبانێ ب تنێ ناھێلین و چ ژ دەستێ مە بھێت ئەم دێ بۆ وان کەین، ئەڤە ئەرکێ ھەموو ئوروپا و جیھانا پێشکەڤتیە”.
پشتی سەرەدانا کەمپێن پەنابەران بالیۆزێ ئەلمانیا و ئەندامێن پەرلەمانێ تورکیا پێکڤە پرێس کۆنفرانسەک سازکرن و د پرێس کۆنفرانسا ل سروجێ دا ل گەل بالیۆزێ ئەلمانیا، ئەنداما پەرلەمانێ تورکیا ئایسەل توگلوک راگەھاند ئەو جارەکا دی ب ئاشکرا ژ بالیۆزێ ئەلمانیا ل تورکیا و ژ ھەموو جیھانێ را دبێژن کو تورکیا ھاریکاریا تیرۆرستێن داعشێ دکەت و گۆت: “ھەم ب بەلگەیێن نڤیسکی و ھەم ژی ب ڤیدیۆ و ھاتیە سەلماندن کو تورکیا دەریێن خوە بۆ تیرۆرستان ڤەکریە و ھاریکاریا مادی و لەشکەری ژ تورکیا و ب رەنگەکی ئاشکرا بۆ تیرۆرستان دچیت و ئەڤە ب چو رەنگەکی ناھێتە قەبوول کرن”.
ل ئالیێ دی د شەرێ ل دژی تیرۆرستێن داعشێ ل کۆبانێ د ناڤا ٤٨ دەمژمێران دا ب دەھان تیرۆرست ھاتینە کوشتن و ئۆپەراسیۆنێن بۆ ئازادکرنا گوندان ژی ب رەنگەکی دژوار بەردەوام دکەن و ھەماھەنگیەکا گەلەک باش د ناڤبەرا پێشمەرگە و شەرڤانێن یەکینەیێن پاراستنا گەل دا ھەیە.
