وه‌زاره‌تا ساخله‌ميێ:بزاڤا چاره‌كرنا كێشا كێمبوونا ده‌رمانان دكه‌ين
ئه‌ڤرۆنيوز:
وه‌زاره‌تا ساخله‌ميێ ل هه‌رێما كوردستانێ راگه‌هاند، دبزاڤێن به‌ردهوام داينه بۆ چاره‌كرنا كێشا كێميا ده‌رمانان ل هه‌رێما كوردستانێ كو ژ به‌غدا دهێن وتێرا پێدڤيێن نه‌خوه‌شخانێن هه‌رێمێ ناكه‌ت.
خالس قادر، په‌يڤدارێ وه‌زاره‌تا ساخله‌ميێ گۆت” پرسا كێمبوونا ده‌رمانان ل نه‌خوه‌شخانێن هه‌رێما كوردستانێ هه‌روه‌كو به‌رێ يه وئه‌و ده‌رمانێن ژ به‌غدا دگه‌هنه هه‌رێما كوردستانێ، تێرا پێدڤيێن وه‌لاتيێن هه‌رێمێ ناكه‌ت، ئه‌و پارێ بۆمه هاتيه دابينكرن ژى يێ كێمه‌وبزاڤ دگه‌ل حوكمه‌تا عيراقێ دبه‌رده‌وامن، هه‌روه‌سا ژلايه‌كێ دى ڤه 30% ژ داهاتێ ساخله‌ميێ بۆ كه‌رتێ ساخله‌ميێ دهێته بكارئينان ونه‌خوه‌شخانه بۆ پێدڤى وده‌رمانان بكاردئينن”.
خالسى زێده‌تر بۆ مالپه‌رێ فه‌رميێ پارتى گۆت” هه‌يڤانه شه‌ش مليار دينارێن دى ژى بۆ وه‌زاره‌تا ساخله‌ميێ هاتينه دابينكرن ودبيت پشكه‌كا وى پاره‌ى كاش ب مه بهێته دان، چونكى هه‌كه ب حازرى ب مه بهێته دان، وى ده‌مى دێ مه شيانێن كرينا ده‌رمانان زێده‌تر هه‌بيت ژلايێ وه‌زاره‌تێ ڤه، ل ده‌مێن بۆرى ژبه‌ركو مه ده‌رمان ب قه‌ر دكرين، ژلايێ كۆمپانيێن بوارێ ده‌رمانان ڤه ب بهايه‌كێ گرانتر ژ بازارى ب مه دهاته فرۆتن، ئه‌وژى گرفته‌ك بوو ونوكه بزاڤا چاره‌كرنا وێ ژى دكه‌ين”.
