به‌رپرسه‌كێ كورد هندى هاته قوتان گيانێ خوه ژ ده‌ست دا
ئه‌ڤرۆ نيوز، فاتما مزوورى:
ژ بەر ئەشکەنجەیا ل سەر دەستێ گرووپێن چەکدار، وەلاتیەکی کورد یێ ئەفرینێ و جێگرێ سەرۆکێ ئەنجوومەنا سڤیل یا ده‌ڤه‌را شیێ تێ شەھیدکرن.
ژێدەرەکی ژ گوندێ قەرمیلق یا سەر ب ناڤچەیا شیێ ڤە دا زانین، ل گوندێ قەرمیلق گرووپا چەکدار ب ناڤێ ئەل-ئێمشات رۆژا پێنجشەمێ 7ێ ھەزیرانێ ب سەر مالا جیگرێ سەرۆکێ ئەنجوومەنا سڤیل یا ناڤچەیا شیێ ئەحمەد محەمەد شێخۆ دە گرتن و ئەو رەڤاندن.
گۆت ژی, پشتی 5 رۆژان ژ لێدان و ئەشکەنجەیێ، چەکدارێن ئەل-ئێمشات شەڤا بووری ئەو بەردان، لێ ژ بەر برینێن خوە یێن گران، ئیرۆ بەربانگێ جانێ خوە ژدەست دا.
ل گۆر وی ژێدەری، جھێ برینان ل ھەموو گەودێ ئەحمەد محەمەد شێخۆ یێ (55 سالی) ھەبوو و برینا گران د سەرێ وی دە بوو.
دا زانین ژی، ژ بەر کو ئەحمەد محەمەد شێخۆ ھەول ددا رێگریێ ل رفتار و بنپێکرنێن گرووپێن چەکدار یێن ل ناڤچەیا شیێ بگرە, ژ ئالیێ گرووپێن چەکدار ڤە ھاتبوو رەڤاندن.
گرووپێن چەکدار یێن سەر ب ئارتێشا ترکیێ ڤە، ژ بلی دزی و تالانکرنا مال و ملکێن وەلاتێن ئەفرینێ، ب بھانە و سەدەمێن جدا ب سەدان کەس رەڤاندنە و ل ھەمبەر بەردانا وان داخوازا برەکە مەزن ژ پەرەیان دکن.
ل گۆر زانیاریان, ژ بۆ ئازادکرنا 4 کەسێن ژ گوندێ قەرمیلق, گرووپێن چەکدار داخوازا 30 ھەزار دۆلار کرنە.