كۆمپانیێن بیانی ڤەدگەرنە ڤە كوردستانێ
ئەڤرۆ نیوز ، زنار تۆڤی :
سه‌رۆكێ ئێکەتیا ژوورا بازرگانى و پیشه‌سازی ل هه‌رێما کوردستانێ ئاشكرا دکەت ، کو ئه‌و كۆمپانیێن ب ئەگەرێ قه‌یرانا دارایى و شه‌رێ داعش كوردستان بجه هێلای یێ ڤەدگەرنەڤە هه‌رێما کوردستانێ.
دارا جەلیل خەیات سەرۆكێ ئێکەتیا ژوورێن بازرگانی و پیشەسازی ل هەرێمێ گوتیە ، بالێوزى رۆمانیا ل عێراقێ سه‌رەدانا ژوورا بارزگانى و پیشه‌سازیا هه‌رێمێ كریە و داخواز كریە کو ئاسانكاری بۆ بهێتە بۆ کرن هەتا جارەکا دیتر ڤەگەرنە هه‌رێما كوردستانێ و كارێن خوە ده‌ستپێبكه‌نه ڤه.
هەروەسا گوتیە ژ بلی رۆمانیا پتریا وان كۆمپانیێن بیانی یێن کو هه‌رێم بجه هێلای یێن ڤەگەریاینە هه‌رێما كوردستانێ و نوکە یێ كارێ خوە د‌كه‌ن ، دیسا گوتیە ، ڤەگه‌ریانا وان كۆمپانیا ب ئەگەرێ نه‌مانا داعش و باشتربوونا دۆخێ دارایى یێ هه‌رێمێ و ئاسایى بوونا په‌یوه‌ندیێن دناڤبەرا هه‌رێمێ و به‌غدا بوویه.
لدووڤ زانیاریێن ئەڤرۆ نیوز نوکە ل هه‌رێما كوردستانێ پتر ژ 25 هزار كۆمپانیێن بیانى و سێ هزار و 250 كۆمپانیێن خۆمالى ل رێڤەبەریا تۆمارا كۆمپانیێن وه‌زاره‌تا بازرگانى و پیشه‌سازیا هه‌رێما کوردستانێ هاتینە تۆماركرن.
هەروەسا لدووڤ ئامارەکا وه‌زاره‌تا بازرگانى و پیشه‌سازیا هه‌رێمێ ، ب ئەگەرێ قه‌یرانا دارایى و دروستبوونا شه‌رێ داعش پتر ژ پێنج هزار و 135 كۆمپانیێن بیانى هه‌رێما كوردستانێ بجه هێلابوون ، به‌لێ د نوکە دا پشکەکا زۆر ژ وان ڤەگەریاینە و زێدەتر ژ 150 كۆمپانیان لقێن خوە ل هه‌رێما کوردستانێ ڤەکرینە.
