راگەھاندنا تورکیا: رەنگە نەخشێ سیاسی یێ تورکیا بھێتە گوھۆڕین
ئه‌ڤرۆ نيوز:
ئەڤرۆکە دێ ھەلبژارتنێن پەرلەمانی و سەرۆکاتیێ ل تورکیا برێڤە چن و ھێزێن ئۆپۆزسیۆنا تورکیا ژی دبێژن ھەکە ئاکپارتی سەختەکاریێ د ھەلبژارتنان دا نەکەت دێ سەرکەفتیێ ھەلبژارتنان بن و ئەحمەد تورک ژی دبێژیت دڤێت کوردان خوەدان ژ دەنگێ خوە دەربکەڤن.
ئەڤرۆکە ل تورکیا دێ ھەلبژارتنێن سەرۆک کۆماریێ و پەرلەمانی برێڤە چن و دەزگەھێن راگەھاندنا تورکیا ژی دیار دکەن کو دێ ھەلبژارتنێن ڤێجارێ ژ یێن بۆری جودا بن، چونکو ڤێجارێ بەرھنگاریا تورکیا شیایە بەرەیەکێ ب ھێز ل دژی ئەردۆگانی دروست بکەت و وەکو جارێن بۆری ئاکپارتی نەشێت ب تنێ ببیتە دەستھەلاتدار و رەنگە پرانیا پەرلەمانی بکەڤیتە دەستێ ئۆپۆزسیۆنا تورکیا و ئەردۆگان ژی د گەرا ئێکێ یا ھەلبژارتنان دا نەشێت سەرکەفیت و رەنگە د گەرا دویێ دا سەرکەفتی بیت، لێ پشتی ھەلبژارتنان ژی رەنگە ئالۆزیێن نوو ل تورکیا دروست ببن.
رۆژناما حوڕیەت یا تورکیا د راپۆرتەکێ دا دیار دکەت کو ئەردۆگان و ئاکپارتی نھا ھەموو بزاڤەکێ دکەن کو جارەکا دی بشێن دەنگێ پرانیا خەلکێ تورکیا بدەستڤە بینن و جارەکا دی ب تنێ ببنە دەستھەلاتدار، لێ ئۆپۆزسیۆنا تورکیا ژی شیایە بەرەیەکێ ب ھێز دروست بکەت و ژ بلی ھەدەپێ دەنگێ ھەڤپەیمانیا مللەت یا کو پارتیا کۆماریا گەل سەرۆکاتیا وێ دکەت گەلەک نێزیکی دەنگێ ھەڤپەیمانیا جمھورە کو ئاکپارتی سەرۆکاتیا وێ دکەت، ئانکۆ ھەڤڕکیەکا مەزن د ناڤبەرا ھەر دو ھەڤپەیمانیان دا ھەیە و ھەکە ھەڤپەیمانیا مللەت شیابا ل گەل ھەدەپێ ژی رێککەفتنەک دروست کربا دا شێن ب ساناھی ئەردۆگانی ژ دەستھەلاتێ دوور بکەن، لێ نھا ژی مەترسی ل سەر پێگەھێ ئەردۆگانی و ئاکپارتیێ یا ھەی و ئەو ب ھەموو رەنگەکێ بزاڤێ دکەن دەستھەلاتێ ژ دەستان نەدەن.
ل ئالیێ دی دوھی ئەحمەد تورک سیاسەتمەدارێ ناڤدارێ کورد ل تورکیا و ئەندامێ بەرێ یێ پەرلەمانی د داخۆیانیەکێ دا راگەھاند کو کورد دێ چارەنڤیسێ دەستھەلاتا نوو یا تورکیا دیار کەن، ژ بەر ھندێ ژی دڤێت ڤێجارێ کورد ب رەنگەکێ باش پشکداریێ د ھەلبژارتنان دا بکەن و ھەروەسا داخواز ژ ھەموو ئەندام و ئالیگرێن ھەدەپێ و ئالیێن دی یێن کوردان کر کو خوەدان ژ دەنگێ خوە دەرکەڤن و گۆت: (راپرسیێن ھەتا نھا ھاتینە کرن نیشا ددەن کو رێژا دەنگێ ئاکپارتیێ گەلەکێ کێم بوویە و دەستھەلاتا وان د مەترسیێ دایە، ئەو دێ ھەموو بزاڤەکێ کەن دا جارەکا دی ببنە دەستھەلاتدار و مەترسیا ھندێ یا ھەی کو ژ بەر رەوشا نەئاسایی یا ل گەلەک دەڤەرێن کوردی ل تورکیا دەنگێ کوردان بھێتە دزین و سەختەکاری بھێتە کرن، ژ بەر ھندێ دڤێت کورد سندوقان ب پارێزن و خوەدان ژ دەنگێن خوە دەرکەڤن).
ھەلبژارتنێن ڤێجارێ ل تورکیا د رەوشەکا نەئاسایی دا برێڤە دچن، چونکو رەوشا ئابووری یا تورکیا رۆژ ب رۆژێ خرابتر لێ دھێت و ئۆپەراسیۆنێن تورکیا ل گەلەک دەڤەران ل دژی ھێزێن پەکەکێ بەردەوامن و شارەزایێن سیاسی یێن ئەمریکی ژی دبێژن ھەکە ئەردۆگان ڤێجارێ شیا ببیتە دەستھەلاتدار رەنگە جارەکا دی نەچار بیت دەست ب قۆناغەکا دی یا ئاشتیێ بکەت و ل ھەمبەر ڤێ یەکێ ژی بەرپرسێن کورد ل تورکیا دبێژن ئەردۆگان و ئاکپارتیێ بووینە پشکەک ژ بزاڤا نەتەوەپەرست ل تورکیا و نەشێن پرسا کوردی چارەسەر بکەن، ھەروەسا بەرپرسێن ھەدەپێ ژی دبێژن ھەکە موحەرەم ئینجە ھەڤڕکی ئەردۆگانی بچیتە گەرا دویێ یا ھەلبژارتنێن سەرۆکاتیێ ئەو دێ ل دژی ئەردۆگانی پشتەڤانیێ ل موحەرەم ئینجە بکەن دا ئەردۆگان ژ دەستھەلاتێ بھێتە دوور خستن.
