کەسەکی ھێرش کرە سەر بارەگایێ رۆژنامەکێ و پێنج کەس ژێ کوشتن
ئەڤرۆ نیوز، فاتما مزووری:
بەرپرسێن خوەجھی ل باژێرێ ئەنابۆلیس یێ پایتەختێ ھەرێما مێریلاند یا ئەمریکا راگەھاندن کو چەکدارەکێ ھێرش کرە سەر ئوفیسا رۆژناما کاپیتال گازیت و گولە بەردانە سەر کارمەندان و د ئەنجام دا پێنج کەس کوشتن و ژمارەک ژی بریندار کرن.
ھەروەسا ھندەک سەرکردێن سیاسی یێن دەڤەرێ راگەھاند کو ئەو چەکدار ھاتیە دەستەسەرکرن و ڤەکۆلین ل گەل وی دەسپێکریە.
ژ لایێ خوە ڤە پارێزگارێ ویلایەتا مێریلاند لاری ھۆجان د کۆنفرانسەکێ رۆژنامەڤانی دا گۆت: “رەوشەکا خەمبارە، ئەم نەشێین ھەموو پێزانینان بدەین، ژبلی کو چەند کوشتی ھەنە”.
زێدەتر گۆت: “ئەو چەکدار ب ناڤێ “گارۆد رامۆس”ە و ژیێ وی 38 سالن و شەڤا بۆری ھێرش کریە سەر ئوفیسا رۆژناما کاپیتال و گۆلە بەرداینە سەر رۆژنامەڤانێن وێ و د ئەنجام دا بۆ ئەگەرێ کوشتنا پێنج کەسان و بریندارکرنا چەند کەسێن دی”.
ب گۆرەی رۆژناما دەیلی مەیل یا بریتانی ژی ئەگەرێ ھێرشێ ئەوە کو رۆژنامێ گۆتارەک د سالا 2011ێ دا ل سەر رامۆس نیڤسیبوو و پشتی کو رامۆس سکالا ل دادگەھێ ل دژی رۆژنامێ تۆمار کری سەرنەگرت، خوەست تۆلێ ژێ ڤەکەت و ئەو ھێرشا چەکداری ئەنجام دا.