200 گه‌شتيار ل ناڤ فرۆكخانا هه‌ولێر مانه ئاسێ
ئه‌ڤرۆ نيوز، فاتما مزوورى:
دوھی پشتی نیڤرۆ نێزیکی 200 گەشتیار، ل ناڤ بالەفرگەھا ھەولێرێ، ژ بەر نەبوونا فرۆکەیان ئاسێ مان.
سەرۆکێ جڤاتا پارێزگەھا ھەولێرێ عەلی رەشید، کو یەک ژ گەشتیارانە، ژ مالپەرا کوردستان24ێ رە راگەھاندیە، بریاربوو فرۆکەیا تایبەت ب ھێلا ئەسمانی (ئەتلەس ژئت) دەمژمێر 1ێ پشتی نیڤرۆ بەر ب ترکیێ ڤە برێ کەتبا، لێ ژ بەر ھەبوونا کێشەیەکە تەکنیکی بەری فرینێ، فرۆکە راوەستیا و تەڤاھیا گەشتیاران ژ فرۆکەیێ داکەتن.
عەلی رەشید دیار کر، کو پشتی دەمەکێ جارەکە دن گەشتیار سواری فرۆکەیێ بوون، لێ جارەکە دن ژ بەر ھەمان کێشەیێ فرۆکە نەفریا و گەشتیارێن کو زارۆک، پیر و نەخوەش ژی د ناڤ وان دە ھەبوون، نەچار بوون دیسا ژ فرۆکەیێ داکەڤن.رەشید گۆت ژی: کەسەکی بەرپرس ل ناڤ فرینگەھێ نەبوو کو بەرسڤا مە بدە و مە پێوەندی ل گەل رێڤەبرا فرینگەھا ھەولێرێ تەلار فایق کر، مە ژێرە گۆت، کو فرۆکە کار ناکە و ئەو نزانن چ بکن.
ھەروەسا سەرۆکێ جڤاتا پارێزگەھا ھەولێرێ، ب دلگرانی گۆت: “ئەز سەرۆکێ جڤاتا پارێزگەھا ھەولێرێ مە و کەس تنە یە بەرسڤا من بدە، گەلۆ وێ چاوا بەرسڤا ڤان خەلکێ ئاسایی بدن؟”.
ناڤھاتی زەلال کر کو بالەفرگەھا ناڤدەولەتی یا ھەولێرێ، بوویە وەک کامپەکە پەنابەران و گەشتیار ئاسێ مانە، نە دکارن بچن دەرڤە، نە فرۆکە ھەیە کو برێکەڤن و خەلک ل سەر رەسیفێ نان خواریە.
رەشید گۆت: کارمەندێن ئیداری کەس ل بالەفرگەھێ تنە یە کو بەرسڤا مە بدن، ئەوێ کو ھەنە ژی، تەنێ کارمەندێن ئاسایشێ نە، ئەو ژی چوو پەیوەندیا وان ب ڤێ کێشەیێ رە تنەیە، تەڤی کو فرۆکە تێکچوو یە، چەنتەیان ژی نادن مە.
سەرۆکێ جڤاتا پارێزگەھا ھەولێرێ راگەھاند، کو ئەوێ جڤینەکە ئاوارتە ژ جڤاتا پارێزگەھا ھەولێررە، تایبەت ب بالەفرگەھێ لدار بخن و لێکۆلینێ دەربارێ کێمانیێن ئیداری بکن.