حسێن قائێدی: ژ بەر گەفان رێژا ئێزدیان ل عیراقێ گەلەک ل کێمێ دایە
ئه‌ڤرۆ نيوز:
رێڤەبەرێ نڤیسینگەھا رزگارکرنا رەڤاندیێن ئێزدی دیارکر، ژبەر گەفێن ل سەر ژیانا وەلاتیێن ئێزدی د ناڤ عیراقێ دا، رێژا ئێزدیان گەلەک ل کێمێ دایە، وھەر کەسەکێ ژ دەستێن تیرۆرستێن داعش ژی بھێتە رزگارکرن ھەموو بزاڤان دکەت عیراقێ بجە بھێلیت و بچتە ژدەرڤەی وەلاتی.
حسێن کورو قائێدی، رێڤەبەرێ نڤیسینگەھا رزگارکرنا رەڤاندیێن ئێزدی یا سەر ب نڤیسینگەھا سەرۆکێ حکومەتا ھەرێما کوردستانێ ڤە، بۆ ئەڤرۆ ئاشکراکر، رێژەکا زۆر یا ئێزدیان ل دەشتا نەینەوا مال ومولگێ خوە بجە ھێلاینە ب رێژا 90% کوردێن ئێزدی ئاوارانە ل ھەرێما کوردستانێ ود بن خێڤەتان دا دژین، وھندەک ژی د ناڤ ھەلاشێن ئاڤاھیان دا دژین، ژبەر رەفتارێن حکومەتا عیراقێ و نەبوونا ئیمناھیێ نەشێن ڤەگەرنە سەر جھێن خوە رەوشا ئێزدیان د ناڤ عیراقێ دا باش نینە، چونکو رەوشا ئیمناھیێ ل عیراقی تیکچوویە ھەکە نەبیژین رۆژانا ژی، بەلکو گەفێن بەردەوام ل سەر ژیانا ئێزدیان ل عیراقێ ھەنە، پیشبینی دکەین ھەکە حەشدا شەعبی ل دەڤەرێن ئێزدیان بمینت ئەو ئێزدیێن ڤەگەریانە سەر جھێن خوە ژی، دی ئاوارە بن رەنگە گەلەک ژی قەستا ژدەڤەری وەلاتی بکەن ھەتا نوکە ژی دەڤەرێن ئێزدیان پشتگوە ھاڤیتنە ژلایێ بەغدا ڤە.
ل گۆری ئاماران ژی رێژا 90% کەمپێن ئاواران کوردێن ئێزدی تێدانە و ھیشتا نە زڤرینە سەر مالێن خوە یە ھیشتا چوو دیار نینە، ڤەگەرن نوکە ل دھۆکێ 93623 ھزار خێزانیێن ئاوارە وپەنابەر ھەنە دبنە 479346 کەس ژوانا ژی 76255 خێزانێن ئاوارانە ئەو دگەھنە 405673 کەسان و 17368 خێزان پەنابەرن ئەوژی دبنە 73678 کەس ئەو ھاریکاریا سالێن 2014 و2015 دھاتە کرن نوکە گەلەک کێم بوویە.
قائیدی زێدەتر گۆت: ھەتا نوکە ژی بۆ تەعداکرنا ل ئێزدیان عەرەب ھەڤکاریا گرۆپ ولایەنیێن سیاسی دکەن، ھەموو ھەولدان دھێنە کرن ئێزدی دەڤەرێن خوە نەمینن وتەعریب بھێـتە کرن ودەڤەرێن ئێزدیان ببنە دەڤەرێن عەرەب نشێن ئێزدی دناڤ مووسلێ دا نەماینە وەختەکێ دا گەلەک مالێن ئێزدیان ل موسل ھەبوون، نھا نەماینە ئەو ئێزدیێن زڤرینە سەر مالێن خوە ژمارا وان گەلەک یا کێمە.
ئەو ژی دیارکر، کو ئەڤە چار سالن حکومەتا ھەرێما کوردستانێ ھەڤکاریا ئاوارێن ئێزدی دکەت، ھەتا نوکە ژی بەغدا وەکو پێدڤی چوو پووتە ئاواران نەدایە لێ ڤی دووماھیی ژی ھاریکاریا رێکخراوان ژی بۆ ئاواران کێم بوویە لێ دەمێ کارەساتا شنگال چیبووی خەلکێ ھەرێما کوردستانێ ب تایبەتی خەلکێ زاخۆ و دھۆکێ و سێمێلی وھەموو دەڤەرێن دێ دەرگەھیێن مالێن خوە بۆ ئێزدیان ڤەکرن وھاریکاریێ پێشکیشی ئێزدیان کرن ئەڤە چوو جاران ناھێتە ژبێرکرن.
ل دووڤ ئامارێن نڤیسینگەھا رزگارکرنا رەڤاندیێن ئێزدی یا سەر نڤیسینگەھا سەرۆکێ حکومەتا ھەرێما کوردستانێ ڤە پتر ژ 3315 رەڤاندیێن ئێزدی یێن ھاتینە رزگارکرن وھیشتا چارەنڤیسی 3100 رەڤاندیێن ئێزدی دیارنێنە.