رێورەسمێن جەژنا چلێ ھاڤینێ ل پەرستگەھا لالش دھێنە گێڕان
ئه‌ڤرۆ نيوز:
ژ ئەگەرێ جینۆسایدا شنگالێ، ئێزدیان رێورەسمێن ئولی، ل پەرستگەھا لالش نەدکرن، د کۆمبوونەکێ دا جڤاتا رۆحانی یا ئێزدیان بڕیار دا، ئێدی ھەموو جەژن و ھەلکەفت ل پەرستگەھێ بھێنە کرن و دوھی 31-7-2018 دەست ب رێورەسمێن ئولی یێن جەژنا چلێ ھاڤینێ ھاتە کرن.
بابە چاویش، ئولدارێ ئێزدیان ل پەرستگەھا لالش بۆ ئەڤرۆ دیار کر کو پشتی 40 رۆژێن چلێ ھاڤینێ ب دووماھی دھێن، ئێزدی رۆژا دووماھیێ دکەنە جەژن، دوھی 31-7-2018 رێورەسمێن ئولی یێن جەژنا چلێ ھاڤینێ ل پەرستگەھا لالش دەستپێکرن و گۆت: “ل رۆژا 2-8-2018 رێورەسمێن جەژنا چلێ ھاڤینێ دێ ھێنە گێڕان، سەردەری و دێدارێن ئایینی رێورەسمان دگێڕن، ئێزدی قەستا پەرستگەھا لالش دکەن و د سەر پرا سەلاتێڕا دەرباز دبن، دچنە سەر حەودا کانیا سپی و دەست و چاڤێن خوە پێ پاقژ دکەن، ھەر ئێزدیەکێ بچیتە پەرستگەھا لالش پێدڤیە ل کانیا سپی و دەریێ قاپیێ و زمزمێ و بەرێ شباکێ و نیشانگەھێن خاس و مەزارگەھێن ئایینی زیارەت بکەت”.
بابە چاویشی ئاماژە دا وێ چەندێ ژی کو ل ھەموو ئێڤاریان ژی سەما دھێتە کێشان و چرایێن ئاقد و نیشانگەھێن خاسا دھێنە ھەلکرن، رێورەسمێن قنتارێ دھێنە گێڕان، کەسێن نە مۆرکری ژی ب ئاڤا کانیا سپی دھێنە مۆرکرن ،ھەموو ئێڤاریان ژی بەیت و قەسیدە دھێنە گۆتن و سمات دھێتە چێکرن، ب ڤان رێورەسمێن ئایینێ رێورەسمێن رۆژانێن جەژنا چلێ ھاڤینێ دھێنە گێڕان.
چەندێن رێورەسمێن جەژنێن ئێزدیان ل پەرستگەھا لالش دھێنە گێڕان، وەکو جەژنا چلێ زڤستانێ، جەژنا چلێ ھاڤینێ، جەژنا جەمایێ کو جەژنا چلێ ھاڤینێ ئێک ژ وان جەژنێن ئێزدیانە ل پەرستگەھا لالش دھێتە کرن.
لوقمان سلێمان، بەرپرسێ نڤیسینگەھا پەرستگەھا لالش یا راگەھاندنێ بۆ رۆژناما ئەڤرۆ خویا کر کو جەژنا چلێ ھاڤینێ ل 24 حوزەیرانێ دەست پێ دکەت حەتا 2/8 بۆ ماوێ سێ رۆژا رێورەسمێن جەژنێ ل پەرستگەھا لالش دھێنە گێڕان و گۆت: ”د ڤێ جەژنێ دا، ئەو کەسێن نەھاتینە مۆرکرن ب ئاڤا کانیا سپی دھێنە مۆرکرن، ژ بەرکو ل نک ئاینێ ئێزدیان ئەڤە فەرزە، دیسا د ڤێ جەژنێ دا پتری 300 زارۆ دێ ھێنە مۆرکرن، ئەڤە بڕیارا میری بوو کو ئەڤ رێورەسمە بھێتە گێڕان، داکو ئێزدیاتی نەھێتە ونداکرن و پێشبینی دھێتە کرن د ڤێ جەژنێ دا 300 ھزار کەس سەرەدانا پەرستگەھا لالش بکەن”.