وەزیرێ دارایی: بەغدا دێ 500 ملیۆن دۆلارێن دی رەوانە کەت
ئەڤرۆ:
رێباز محەمەد حەملان وەزیرێ دارایی راگەھاند کو 18 ڤێ ھەیڤێ بەغدا دێ 500 ملیۆن دۆلارێن دی رەوانەی ھەرێما کوردستانێ کەت و ژ وی پارەی مووچێ وان ھەموو وەزارەتان دێ ھێتە دان یێن ھەتا نھا مووچێ ھەیڤا دەە وەرنەگرتین.
ل دۆر گیرۆبوونا بەلاڤکرنا مووچێ ھەیڤا دەە، دلێر تارق پەیڤدارێ وەزارەتا دارایی دیار کر کو گیرۆبوونا بەلاڤکرنا مووچەی چو پەیوەندی ب گەشتا وەزیرێ دارایی بۆ دەرڤەی وەلاتی ڤە نینە و ھەکە وەزیر یێ بەرھەڤ ژی نەبیت، پرۆسە ب رێڤە دچیت و گۆت: “بەلاڤکرنا مووچێ فەرمانبەران پەیوەندی یا ب رێڤەبەریا گشتی یا ژمێریاری ڤە ھەی”.
پەیڤدارێ وەزارەتا دارایی ئاشکرا ژی کر، گیرۆبوونا بەلاڤکرنا مووچەی پەیوەندی یا ب نەھنارتنا پشکا دویێ یا وی پارەی ڤە ھەی کو بڕیار بوو حوکمەتا عیراقێ بھنێرت، ھەتا نوکە نەگەھشتیە ھەرێمێ.